Beisei pha lo Spurs leh Saints

Pathianni zan Premier League inkhelah Southampton leh Tottenham Hotspur te chu St Mary's Stadium-ah 1-1 in an inhnehtawk. Saints hian November 26-a Everton an hneh hnuah chak hmel an hmu tawh lo a, tla thei dinhmunah an ding mek.

Mauricio Pellegrino hote hian match 24-ah point 22 chauh an hmu a, 18-naah an awm. Season liam taa pahnihna Spurs-in point 45 an hmu tawh chungin Champions League khel pha china awm Liverpool chu point hnihin an pha lo a, Reds hian nizan khan Swansea an hmachhawn a, inkhel result a zirin an inthlauhna a la tam thei bawk.

A goal hma
Southampton-in Manolo Gabbiadini hmangin Spurs keeper Michel Vorm tan hna an siam sak a, an khel ṭha zawk. Minute 15-na lekah an phu ang ngeiin hma an hruai a, Ryan Bertrand cross chu Tottenham defender Davinson Sanchez-a'n an lamah a tilut.

Amaherawhchu Spurs-in goal khung thei striker an nei a, minute 18-naah Harry Kane-a'n Ben Davies-a corner pet chu a tauh lut. English striker hian tun season-ah goal 21 a khung tawh a, top scorer a ni mek.

Minute 20 chhung lekin goal hnih a lut nachungin goal dang hmuh tur a awm tawh lo. Saints defender Jack Stephens chuan goal khung theihna tur chance ṭha bik a hlah a, kum 17 mi Michael Obafemi-a'n club tana vawi khat inlanaah goal a khung lo a, Sofiane Boufal pawhin scoresheet-ah a hming a nem kai thei lo.

Tottenham-in damlohna vanga tel lo Christian Eriksen-a tel loh zanah zan dang an pha lo a, hun tawp lamah erawh chak tumin an goal bawh a na. Minute ruk chiah a awm tawh tihin Erik Lamela goal khung tur chu Stephens-a'n a tihsual siam ṭhat nan a dan sak a, Kane-a'n chakna goal khung theihna tur hun ṭha a hlah bawk.

Dinhmun derthawng Pellegrino
Premier League match 11 chhung chak tawh lo Saints manager Mauricio Pellegrino chu ban theih dinhmunah a ding a, Argentine manager erawhin a hlauhthawn loh thu a sawi.

Pellegrino chuan, "Ka hna chungchangah hlauhthawnna ka la nei lo a, tuna ka chungchang an sawi ang hi chu kan hnain a ken tel a ni. Argentina-ah chuan football coach hi electric ṭhuthleng nen kan khaikhin a, rei tak ṭhut theih a ni lo. Kan team dinhmun thlir chuan kan awmna hi a ṭha lo a, chutihrualin chiang lehzuala kan bihchian chuan kan chunga awm te nen hian kan inthlauh loh avangin kar thum chhung lekin engkim a danglam thei a ni," tiin an la insiamṭhat theih thu a sawi.

Tottenham boss Mauricio Pochettino chuan, "Saints an khel ṭha a, chutihrualin kan khelh danah erawh ka lawm lo," tiin insiamṭhat an mamawh thu a sawi a, January transfer-ah erawh an team siam ṭha thei tur lak an har tur thu a sawi.