Goal 100 khung thei Muller

Thomas Muller chuan Bundesliga bika goal 100 khung tling turin Werder Bremen lakah goal hnih a khung a, Germany international hian Bayern Munich chu 4-2 in hnehna a chanpui.

Pathianni zan Bundesliga inkhelah German champion Bayern tan Muller leh Robert Lewandowski ten goal hnih ve ve an khung a, mikhual Bremen goal hnih hi Jerome Gondorf-a khung leh Niklas Sule-a'n anmahni lama a tihluh palh a ni.

Kum 28 mi Muller hian goal 100 khung tur hian match 272 a khel a, goal a khung tawhna inkhelah chuan Bayern hian chak loh an nei ngai lo. Muller chuan, "Mellung pawimawh hi ka phun hnai tih chu ka hria, mahse tun ṭumah hian a nih ka la beisei lo," tiin a rin aia hmain goal 100 a khung tlin thu a sawi.

Bayern Munich hian tun hnaiah a zawnin Bundesliga match ruk chhung hnehna an chang tawh a, point 47 hmuin an hnuaia awm Bayer Leverkusen aiin point 16 zetin an sang fal tawh–nomawi an humhim ngeiin a rinawm tawh hle.