Real an thangharh, a tlai tawh?
Pathianni zan La Liga inkhelah Real Madrid-in an thiam an la theihnghilh lo tih an pholang a, an mikhual Deportivo La Coruna chu 7-1 ngawtin an sawp – Real lawmna belhchhah turin Cristiano Ronaldo leh Gareth Bale ten goal hnih ve ve an khung a, December 9 hnuah Zinedine Zidane-a nauten league match-a hnehna an channa hmasa ber a ni.
Real chak zanah Barcelona-in hnehna an chang ve bawk a, an mikhualna ramah Real Betis chu 5-0 ngawtin an sawp – Catalan club tan Lionel Messi leh Luis Suarez ten goal hnih ve ve an khung bawk a, point 11-a hma hruai fal chungin La Liga table chung ber luahtu an ni.
Hei le Real
Santiago Bernabeu-a inkhelah mikhual team tan Adrian Lopez chuan minute 23-na lekah goal hmahruai a khung a, an match hnuhnung paruka vawi hnih chiah hnehna chang thei Real an mualpho nawn dawn niin a lang–mah se Zidane-a nauten hnehna chan zawh loh reng an ning tawh a, Adrian goal hi Real chhaih thinrimna mai a ni.
Goal an chhuah aṭanga minute kuana lekah Nacho chuan an si phurh a sut nghal a, a bak zawng chu Real ta a ni tawh – Bale chuan minute 42-naah an hmahruaina goal ni tur nalh zetin a khung chhunzawm a, chawlhlawk hman a nih hnuah a goal hnihna a khung leh bawk. Luka Modric-a'n goal a khung ve leh hnuah Ronaldo-a'n goal hnih a khung a, goal hmahruaitu Nacho chuan a tawp kharin a goal hnihna a khung ve leh bawk.
Ronaldo a kir e!
Kum 32 mi Ronaldo-a'n tun season-ah beisei a phak lo a, Real chet chhiat chhanah an thiampuipa chet ṭhat loh hi chhuanlam tling tak a ni–dawhtheihna tlachham ve tak Real fans tam zawk chuan Spanish chanchinbu lar AS-in vote a lak dan aṭanga tehin chhuak tura duhtu a ngah zawk leh der tawh a, Pathianni zana an inkhelh hma hian league goal li chiah a khung.
Portuguese forward hian second half-a a hun ṭha neih hmasak ber chu hnai set sawt aṭangin a hlah a, tun hnaia Manchester United nena sawizawm hlawh mek forward hian inrintawkna a tlachham niin a lang hman – mah se, minute 78-naah Ronaldo kan hmuh
ṭhin kha a inlar a, Casemiro ball pek duhthusam chu inringtawk takin a khung. Minute ruk hnuah a goal hnihna a khung leh a, he goal a khungna lamah hian a mitah hliam tuar mah se Zidane chuan inkhelh zawhah ngaihtuahawm a nih loh thu a sawi.
Danglam lo Real
Real-in goal sarih ngawtin hnehna an chang a, Zidane chuan an khelh dan an thlak danglam tak viau vang a nih chuan loh thu a sawi. French manager chuan, "Inthlak danglam vak a awm lo. Match hnuhnung bera Villarreal kan hneh loh ṭum pawh khan kan khel ṭha em em a, a danglamna chu tunah chuan hnehna kan chang hi a ni," a ti.
Zidane chuan sawi zawmin, "Vawiina danglam chu kan result a ni a, kan chance neihah goal kan khung a, chu chu a ni mai. Goal sarih ngawt khung hi tih zen zen theih a ni lo a, chuvangin ka hlim a ni," tiin a hlim thu a sawi.
Suarez = 100
Barcelona tan Luis Suarez-a'n goal hnih a khung a, Catalan club tan La Liga-ah goal 100 a khungna chiah a ni – Uruguayan striker hian Barca tana goal 100 khung tling tur hian match 114 bak a mamawh lo. Uruguay player zingah La Liga-a goal 100 khung thei dang player pakhat chiah a awm a, chu chu Diego Forlan (128) a ni.
Barca hian goal khung turin second half an nghah thlen a ngai a, minute 59-naa Ivan Rakitic-a'n goal hmahruai a khung hnuah erawh an hawikir tawh lo. Suarez bakah hian Lionel Messi chuan goal hnih a thawh ve bawk a, kum 30 mi forward hian league match 20-a khelhah goal 19 khung tawhin top scorer a ni mek–a career-a a vawi khat nan La Liga match nga chhung a zawnin asssist a nei tawh bawk.
Messi faktu Valverde
Barcelona coach Ernesto Valverde chuan a player Messi fakin, "Hmuhnawm ti taka en mai hi kan tih tur chu a ni. Nitina Messi inkhel lai ka en thei hi ka vannei takzet a, khawvela footballer piang tawhah ani aia ṭha an awm lo a, an awm ngai bawk hek lo ang," a ti.
Spanish manager chuan, "Real nen point 19-in inthlau mah ila ala ngaihnawm dawn chauh a ni. Match tinah hnehna chan zel kan tum ang a, engnge lo thleng dawn kan ngaihtuah lo ang. Match 18 khelh tur a la awm a, a la tam em em a ni," tiin champion an la nih loh thu a sawi.