Vawi hnih nan PSG an chak lo

French Ligue 1 season kal laiah Paris St-Germain chu a vawi hnih nan an tlawm. Pathianni zan khan PSG hi an hnuai chiaha awm Lyon lakah 2-1 in an chak lo a ni.

Lyon tan Nabil Fekir-a'n minute hnihna lekah mawi zeta freekick chhuih lutin hma an hruai a, chawlhlawk hma chiahin Layvin Kurzawa chuan a sut.

French club lian pahnih an inkhel tawh a, footballer manto ber Neymar inlan theih loh zanah rawlthar duhawm Kylian Mbappe chu hliam vanga lak chhuah a ni, PSG goal nawr a na tawk lo a, minute 57-naah defender Dani Alves chu Tanguy Ndombele laka a foul vangin hnawhchhuah a ni.

Goal dang lut zo loin an inṭhaṭhen mai dawn niin a lang hman, hun pek belh minute 94-naah Manchester United winger hlui Memphis Depay chuan hla deuh tak aṭangin chakna goal a thlawh lut, tun season chhunga a league goal kuana chiah a ni.

Lyon hian match 22 an khelh tawhah point 48 hmuin pahnihna an ni mek a, an chunga awm PSG hian point 56 an hmu tawh thung. European football khel ṭhang Lyon hian season tharah Champions League khelh an tumna an chhawmnung chho zel.

Lyon captain Nabil Fekir chuan, "Paris hian hma an hruai fal tawh hle a, kan tum ber chu Champions League khelh phak a ni. Match khelh tur a la tam hle a, a sang pathum zinga tel ngei tumin kan theihna zawng zawngin kan bei dawn a ni," tiin a sawi.

PSG manager Unai Emery chuan, "Team pahnih te khan minute 90 chhung chu kan theihna zawng zawngin kan khel a, a chang chuan kan beisei loh result kan neih chang a awm ṭhin. Lyon khan player an nei ṭha a, goal khung an phu," tiin a sawi.