Alexis Sanchez leh Mkhitaryan

Manchester United chuan an elpui Arsenal aṭangin Alexis Sanchez chu Premier League player hlawh tam ber ni turin an thlem chhuak a, Chilean forward lalut turin United-in an hmelma Arab sum mawm chawmtu Manchester City aiin sum an seng huai zawk.

Premier League-a sulhnu nei ṭha ber club chuan chhuang takin Alexis an lakluh thu hi Thawhṭanni zan khan an puang a, United duhthusam a thlen theih nan Henrikh Mkhitaryan chuan London club a pan ve thung. Armenian midfielder hian kum thum leh a chanve daih contract a ziak a, kar khatah £ 200,000 vel a hlawh dawn niin an tarlang.

Sanchez hian kum li leh a chanve daih contract a ziak a, chhiah chhiar tel loin a contract hlut zawng hi kum khatah pound maktaduai 14 vel a ni. Chilean forward hi Zirtawp zana Manchester United-in FA Cup fourth round-a Yeovil Town an hma­chhawn hunah chhawr theih a ni.

An inthleng
Kum 29 mi Alexis manah hian Gunners chuan pound maktaduai 35 an chhiar a, United hian pawisa aiah July 2016-a Borussia Dortmund aṭanga pound maktaduai 26.3-a an lakluh kum 29 mi tho Mkhitaryan an pe thung.

United leh Arsenal player in­thleng chungchang hi January transfer-a chanchin ngaihnawm ber zinga mi a ni tawh dawn a, thil mak tak chu club pahnih tan thu lawmawm tia sawi theih ve ve a ni.

Arsenal-in season tawp ruala contract tawp mai tur Alexis an chhuah hi channa a ni tawh lo a, an club tana rilru pe tawh lo aia theihna nei sang tak Mkhitaryan an chang thei hi hnung lama sa barh a ni.

United ṭantuten Armenian mid­fielder theihna an hmu hman lo hi an vanduai a, Arsenal kawr ha chunga a chet ṭhat apiangin an rilru a na thar ang. Amaherawhchu record thlira buk rit zawk Alexis Sanchez an chan phahna a ni a, Micki vanga lungngaihna mittui hi lawmna mittuiin a thlak thuai ang.

City ngamtu United
Manchester United-in khel­mual­ah Pep Guardiola hnuaia intuai thar mek Manchester City an tluk lo. Sir Alex Ferguson-a'n tham lo taka 'noisy neighbour' tia a koh City lakah United tlawm zawk nih an tum reng lo a, Pep Guardiola hoten an 'patta' fel tawha an ngaih chu an chhuh sak.

United lam ṭantute chuan an club sulhnu ropuina hmanga Alexis hmin niin an sawi a, an lakluh chhan tak erawh Gunners hnenah a thlak theihna tur Mkhitaryan an pek theih bakah sum an tawk tarh hnem vang a ni. Chilean forward hlawh tur zat hi chiang taka hriat theih ni lo mah se bonus leh fakna aṭanga a sum lakluh te nen chuan kar khatah pound nuai nga vel a ni.

Tun dinhmuna United player hlawh tam ber Paul Pogba (£290,000) aiin a tam zawk a, Romelu Lukaku (£250,000) leh Zlatan Ibrahimovic (£220,000) te hlawh belhkhawm pawhin an phak lo a, Premier League player ṭha dang Sergio Aguero (£220,­000) leh Eden Hazard (£220,000) te hlawh let pawhin a pha lo.

Alexis7
Tunlai chhanah chuan club-in player ṭha bik tlangzarh turin jersey nen thla an lakpui ngawt tawh lo a, United pawhin Alexis tlangzarh nan mawi danglam takin video an siam. Chilean forward hian hian dressing room-ah United jersey no. 7 chu hain Old Trafford-ah a chhuak a, Alexis vek hian 'Glory Glory Man United' tih chu piano hmangin a tum bawk.

United chuan an player thar Alexis hi an chhuang tih a hriat a, an player ropui Eric Cantona, David Beckham leh Cristiano Ronaldo te hak tawh ṭhin jersey no. 7 an pe a, hlawhtling tura beisei a nih rualin he number ha tawhtu Michael Owen, Antonio Valencia, Angel Di Maria leh Memphis Depay te erawh an hlawhchham.

United an lian
Sanchez hian July 2014 khan Barcelona aṭangin pound maktaduai 30-in Arsenal a zawm a, London club tan goal 80 a khung a, season liam ta khan inelna hrang hrangah goal 30 khungin club top scorer a ni.

United player thar Sanchez chuan, "Khawvela club lian ber ka zawm hian min ti zau thau a. Stadium sulhnu ropui tak neia ka khel tur te leh Jose Mourinho hnuaia ka khel tur te hi a hlu a ni," tiin a club thar a fak.

Chona hmachhawn a huam thu sawiin Sanchez chuan, "Chilean player zinga United tana khel thei hmasa ber ka ni hi ka inchhuang a, khawvel hmun hrang hranga kan club ṭantute hnenah min lakluh chhan hi lantir ka tum ang," tiin a sawi.

Manchester United manager Jose Mourinho chuan, "Alexis hi khawvela attacking player ṭha ber zinga mi a ni a, kan player naupang leh theihna nei sang tak tak awm sa hi a tikim chiah ang. A tum ruhna leh a rilru put hmang te avang hian Manchester United player ni tlak a ni," tiin an player thar chungchang a sawi.

London lam...
Arsenal zawmtu Mkhitaryan hian tun season Premier League match 15 a khelhah goal khat khung tawhin assists vawi nga a nei tawh a, Arsene Wenger-a'n Borussia Dortmund tana a khelh laiin lakluh a tum tawh a, Armenian midfielder khelh dan hmang hi French manager duh dan nen a inrem hle niin a lang bawk.

Mkhitaryan chuan, "Arsenal tana khelh hi ka lo suangtuah ṭhin a, ka duhthusam a thleng thei hi ka lawm hle a ni. Club-in sulhnu ṭha a neih theih nan ka theihna zawng zawng ka chhuah ang," tiin Gunners tan malsawmna nih a tum.

Armenia captain hi 2015-16 season-ah Bundesliga player of the season a ni a, hemi season hian inelna hrang hrangah goal 23 a khung. Wenger chuan, "Henrikh hian goal chance a siam thei a, goal venhim a thiam a, a chet ran bakah team tana a inpek avangin player ṭha in a neih tur ang zawng zawng chu a nei a ni," tiin player ṭha tak an lakluh thu a sawi.

Arsenal hian Champions League khelh ngei tumin squad thuam chak an tum a, Mkhitaryan-a khelhpui ṭhin Pierre Emerick Aubameyang chu Borussia Dortmund aṭangin lakluh tumin an dawr mek bawk.