Number 1 Nadal hnehtu Cilic

World number Rafael Nadal chu nimin tlai khan Marin Cilic lakah 6-3, 3-6, 7-6, 6-2, 2-0 in an chak lo a, vawi khat a champion tawhna hmun Australian Open-ah quarterfinal a paltlang zo ta lo. Seeded parukna Cilic hian semifinal-ah chuan Kyle Edmund a hmachhawn leh ang.

Rod Laver Arena-a inkhelah Nadal-a'n bul a ṭan fuh, minute 52 chhungin set hmasa ber a la. Set hnihnaah erawh US Open champion hlui Cilic-a'n game hnuhnung pali la zawnin set a la ve thung. Set hnih ve ve an lak hnuah deciding set hmanga chak zawk zawn a ni a, Cilic-a'n 2-0 a hma a hruai laiin hliam vangin Nadal a khel zui thei tawh lo a ni.

Mang ramah Edmund
Nimina Australian Open mipa singles quarterfinal inkhel hmasa zawkah Britain tlangval Kyle Edmund chuan seeded pathumna Grigor Dimitrov hnehin a vawi khat nan Grand slam semifinal a in vaw kai.

World number 49 Edmund hian a thiam pali zinga tel tur hian 6-4, 3-6, 6-3, 6-4 in hnehna a chang. Open Era chinah, Britain player zinga Grand Slam semifinal lut thei parukna chiah a ni - Tennis ngaina Britain mipui ten Andy Murray awm loh ni a ṭan tur an nei.

Kum 23 mi Edmund hian forehand a nei ṭha a, winners vawi 46 a vaw chhuak thei - a chakna thapui pawimawh tak pawh a service na tak a ni. Tun hmain Edmuna hian player langsar lakah hnehna a la chang ngai lo, world ranking-a a sang panga chin vawi 12 a hmachhawn tawhna zinga a chak hmasa ber ṭum a ni.

Hnehna a chan hnuah Edmund chuan, "Dimitrov hi player ṭha a ni a, a match hmasa lama Nick Kyrgios nen an inkhel pawh kha ka en. Tihsual a nei tlemin mi a nawr na thei hle. Ka naupan deuh laia ka player ngaihsan leh entawn ṭhinte thlen ang ka thleng ve ta mai hi mak ka ti hle," tiin a sawi.

Federer inlan dawn
Champion lai Roger Federer chuan vawiin chawhnu lamah seeded 19-na Tomas Berdych a hmachhawn dawn. Grand Slam vawi 19 champion tawh Federer hian kumin Australian Open-a match li a khelh tawhah set a la hloh lo a, a khingpui tur Berdych pawhin set khat chiah a la hloh avangin inrintawkna an nei sang dun hle ang.