David leh Kareem-te dinhmun chiang lo

Aizawl FC chuan January 25, Ningani tlai dar 2:00 hian RG Stadium-ah Mohun Bagan an hmachhawn dawn. Mizo club hian an player pawimawh David Lalrinmuana leh Kareem Omolaja te an chhawr thei dawn em tih a la chiang lo.

Zemabawk tlangval David-a hian Chennai City an hneh ṭumin goal a khung bakah penalty a hlawh chhuak a, hero of the match-ah thlan ni mah se East Bengal nena an inhnehtawk leh Neroca an hneh loh ṭumin hliam vangin squad-ah a awm lo.

AFC coach Pau­lo Meneses chuan, "David-a hian hma a sawn a, training a zawm tawh. Kareem erawh MRI test result kan la nghak," tiin a sawi.

Kareem hian Neroca laka goal a khung zawhah a inhliam a, Nigerian defender awm loh hnuah AFC-in goal hnih an chhuah. Aizawl FC tana thu lawmawh erawh hrem vanga match hnuhnung ber khel thei lo Afghan defender Masih Saighani chhawr theih a ni leh tawh ang.