Arsenal muala goal khung tum Chelsea

Zanin dar 1:30 hian League Cup semifinal second leg khel turin Arsenal chuan Chelsea an mikhual dawn. Team pahnihte hi Blues khelmualah goal awm loin an inhnehtawk tawh a, zaninah erawh Wembley Stadium pan tur zawk chinfel ngei a ngai dawn–inhnehtawk a awm thei tawh dawn lo.

Antonio Conte nauten Stamford Bridge-ah goal an khung loh avangin khualmualah an hna a hautak sawt tura ngaih a ni, Blues playmaker Eden Hazard chuan Emirates Stadium-ah goal khung ngei tumin Arsenal an nawr tur thu a sawi.

Chelsea hian an match hmasa lamah Nottingham Forest, Everton leh Bournemouth te chu an mualah vek an hneh a, tun season League Cup bikah chuan zanin hi khualmuala an lenluhna hmasa ber tur a ni dawn. Arsenal pawhin an mualah Doncaster Rovers, Norwich City leh West Ham te an hneh bawk.

Goal a ngai
Arsenal hian an khelmualah goal khung an harsat ngai lo. Tun hnai an match hnuhnung pathumah goal kua an khung thei, heng zingah hian Janaury 3 zana Chelsea nen 2-2 a an inhnehtawk pawh a tel. League match an khelh ṭum hian Chelsea hian huaisen takin an nawr ngam a, zaninah pawh hetianga khelh hi an tum ang.

Blues playmaker Hazard chuan, "Semifinal a ni tawh a, hnehna chan tumin kan inlan ang. Arsenal laka mahni goal venhim ringawt kan tum a nih chuan kan tisual ang, goal khung kan ngai a ni,"

"Kan khingpuite tana harsatna siam kan tum tur a ni a, goal khung tur chuan a bulṭhut aṭanga kan inrem fuh pawh a ngai. Player tinin inman taka kan khel tlang leh a nih phawt chuan goal pawh kan khung ang," a ti.

Chelsea hian Inrinni zan khan Brighton and Hove Albion chu 4-0 in an sawp a, hemi ṭuma hrem vanga inlan thei lo Alvaro Morata leh Pedro Rodriguez te an inlan thei tawh dawn a, kerek hliam goalkeeper Thibaut Courtois bakah Cesc Fabregas leh Gary Cahill te chu hliam vang bawkin an dinhmun a la chiang thei rih lo.

Belgium international Hazard chuan sawi zawmin, "Manager-in team a siksawi pawh a ni thei, thil chiang tak erawh chu khelmual chhunga lut ten hnehna chan tumin kan bei dawn. Nomawi chawi ngei kan duh a, chung zingah chuan League Cup pawh a tel. Khemual lian leh nuam takah kan inkhel dawn a, hetiang hunah tak hian hnehna chan a nuam zual ṭhin," tiin hnehna hlado chham chung ngeia Emirates Stadium chhuahsan an tum thu a sawi.

Arsenal an harh?
Transfer bazar, player hliam leh goal khung harsat vangin Arsenal team boruak a chiri a, result ṭha an nei thei lo. Mahse, Arsene Wenger-a nuate hian an match hnuhnung berah erawh Crystal Palace lakah football mawi khelin 4-1 in hnehna an chang, striker manto Alexandre Lacazette-a'n goal a khung leh ta bawk.

Arsenal midfielder Jack Wilshere leh Mesut Ozil an inkawp fuh a, goal nawr kawngah Lacazette an thlawp ṭha leh hle tawh. Anni pathum hi an inkawp leh a nih chuan Blues tlarhnung tan ven an hautak ve khawp ang.

Gunners manager Wenger-a'n tun hmain League Cup hi a ngai pawimawh ngai lem lo, player naupang zawkte chher hriam nan a hmang ṭhin. Amaherawhchu, nomawi chawi a harsat tawh avangin Blues an hmachhawn hmasak ṭum chuan senior player a chhawr nual–zaninah pawh a chawr nawn ngeiin a rinawm.

Arsenal hi FA Cup aṭanga an tlak tawh avangin kartawpah match an nei dawn lo a, hei vang hian player ṭha an khel a nih pawhin buaina tur a awm lo ang. Striker Olivier Giroud leh Danny Welbeck te hliam a la dam lo a, Aaron Ramsey leh Nacho Monreal ten hliam vangin Chelsea an hmachhawn thei dawn lo bawk.