A vawi khat nan Mertens-i'n semifinal lut

Australian Open hmeichhe singles champion tur rinthiam a la har hle. Nimin khan Elise Mertens chuan Elina Svitolina hnehin semifinal a lut. Belgium nula Mertens hian Melbourne-ah quarterfinal a vawi khat paltlangna chiah a ni.

Rod Laver Arena-a inkhelah world number 37 Mertens hian darkar khat leh minute 13 chhungin seeded palina Svitolina hi 6-4, 6-0 in a hneh, kum 22 mi Mertens hian world ranking-a pangana chin player a vawi khat hnehna chiah a ni bawk.

Seeded pawh ni phak lo Mertens hian Svitolina service a ngam hle, vawi nga ngawt a chhuhsak. A khingpui service bikah point 52 hmuh theih zingah 28 a chhuhsak theih avang hian semifinal lut tur hian harsatna a tawk lo.

Mertens hian Australian Open inbuatsaih nan khan Hobart title a la a, tunah hian a match hnuhnung 10-ah hneh loh a tawng lo–semifinal paltlang tur chuan Caroline Wozniacki leh Carla Suarez Navarro te inkhela a chak zawk a paltlang leh a ngai dawn.

WTA title pahnih la ve tawh Mertens chuan, "Ka tan chuan ka hun tawn hi sawifiah ngaihna a la awm rih lo. A tir aṭanga ka nawr nat nghal loh chuan a buai zawkah ka ṭang dawn tih ka hre reng a, set hnihna kha ka beisei aiin a awlsam ta hlauh zawk a ni," tiin a sawi.