Liverpool tan Swansea-ah traffic a 'jam'

Ropui taka Manchester City an hneh hnu lawkah Liverpool-in an ze ngai an chhuah leh ta–hnehna chang ngei tura ngaih an nih laiin Swansea City khelmualah Alfie Mawson goal vangin 1-0 in an tlawm a, match 18 chhung tlawm hmel hmu loa an kaltluang lai chu a tawp.

Inkhelh zawhah Swansea boss Carlos Carvalhal chuan, "Liverpool hi team ṭha tak an ni a, Formula 1 car ang mai an ni. Mahse, London khawpuiah tlai dar li traffic jam-ah chuan Formula 1 car tan pawh tlan ngaihna a awm lo," a ti a, Liverpool chu London khawpui traffic jam-a Formula 1 car tang nen a tehkhin.

"Traffic kan jam tir a ngai a, an tlan tlangna tur kawng kan hawng tur a ni lo tiin inkhelh hma khan ka naute ka hrilh a ni," tiin an tumah an hlawhtlin thu a sawi zui.

Reds an chesual
Liverpool boss Jurgen Klopp chuan, "Result ai mah chuan kan khelh dan khan minti lunghnur a, kan duhdanin kan khel chhuak lo. Goal khung theihna remchang kan siam sak a, khel tura anni lamin min duhdan ang takin kan khel"

"Swansea khan hnehna chang tur chuan keini lam kan chetsual a ngai tih an hria a, an duhdan takin kan va khelh sak a ni," tiin a lungawi lo hle.

Klopp hi a demawm hran lo–Swansea tan tlarhnunga inkawp pathum Mawson, Federico Fernandez leh Mike van der Hoorn te an nghing duh lo a, tlarhmaah Jordan Ayew a taima a, ṭum khat phei chu hlauhawm zetin Loris Karius a rum ṭhaih. Liverpool-in beisei an phak lo a ni.

Ngaihlai Coutinho
City laka Liverpool inkhel en kha chuan Merseyside club-in Philippe Coutinho an mamawh loh zia pawr taka sawi ngam a ni a, tunah erawh khatih hunlaia Coutinho mangṭhana kut phartu te tan pawh kimki taka kut lak thlak a hun leh tawh–Brazilian playmaker tel loin Reds-in player inkhel thlak danglam dawrh thei an kawl lo niin a lang a, goal ven ringawt ngaihtuah team laka talchhuah dan an hre lo.

Khawvela defender manto ber Virgil van Dijk-a'n Reds tan a a league match hmasa ber a khel a, Dutch defender awm hnuah Reds tlarhnung a phui lo mai a ni lo–an goal chhuah hi pound maktaduai 75 man defender chetsual vanga lut a ni.

Southampton aṭanga Anfield pantu defender hian corner aṭanga ball lokal chu tauh chhuah tum mah se a chhuk zawngin a tauh a, Swansea captain Fernandez a per hnuah Mawson chuan a kil sirah mawi zetin a khung–corner pawh hi Van Dijk a chawi tho a ni!

Team in ang lo
Thawhṭanni zana team pahnih intawn hmain Swansea City-in inelna hrang hrangah goal 22 chiah an la khung a, an team pumpui goal khung hi Liverpool forward Mohamed Salah-a goal khung zat aiin goal hnihin a hniam zawk.

Klopp-a naute an mikhual hma khan an khelmuala Premier League match an khelh hnuhnung 11-ah vawi sarih tlawm hmel an hmu a, Reds kha ngam lo leh ngat se Premier League-a an home record neih chhiat ber an tluk dawn tihna a ni. Mahse, coach Carvalhal-a defensive game a hlawhtling a, thawnthu dang ziahlanin a awm ta zawk.

Liverpool hi an chance neihah goal hmaah an hriam tawk lo. Salah-a'n hnai tak aṭanga a hun ṭha neihah Swansea net a zawng hmu zo lo a, Alex Oxlade-Chamberlain hun ṭha neih chu goalkeeper Lukasz Fabianski chuan ṭha zetin a dan sak a, Sadio Mane-a'n hming chherna remchang a neihah a pet out bawk–hun tawp hnaih thleng beidawng loin Reds-in an nawr a, mah se hun pek belha Roberto Firmino-a'n post a pet per meuh kha chuan Liverpool tan beiseina a tawp tawh tih ngam a ni.

Ngaihdam diltu Klopp
Liverpool manager Jurgen Klopp-a'n Swansea an hneh loh ṭum hian Liverpool fans zinga pakhat a inhnialpui a, a hnuah ngaihdam a dil leh. Klopp chuan, "Mi kha a rawn au reng a, ka tuar reng peih loin vawi khat ka va chhang ve zauh a, ngaihdam ka dil a ni," a ti.

Klopp chuan sawi zawmin, "Professional manager ringawt ni loin mihring ve tho ka ni a, engtiklai pawha auh nawmnah tuar reng tur ka ni bik lo tih kha ka inhre chhuak thut a ni," tiin amah au nawmnahtu fan a chhan chhan a sawi a, ngaihdam a dil.

German coach hi insawifiah chhunzawmin, "Vawi khat chu 'Min hrethiam rawh' tiin ka va khap a, manager zinga fan-te chhanglet hmasa ber ka ni lo ang tih ka chiang a ni," a ti a, Swans nena an inkhel sawi nghalin, "Anni chuan huai taka sual a ngai tih an hria a, chutiang tihna hun ṭha chu kan pek hnuah inrintawkna an nei a ni," tiin a naute khelh dan a dem.