Malcom a chhuak dawn lo

Bordeaux manager thar Gus Poyet chuan tun hnaia Tottenham Hotspur leh Arsenal nena sawi zawm hlawh mek Malcom chu a chhuah loh tur thu a sawi a, Ligue 1 club thuneituten Malcom an chelh tur thu an tiam avanga Bordeaux zawm a nih thu a sawi.

Sunderland manager hlui Poyet chuan, "Bordeaux-in min sawma ka zawhna hmasa ber chu Malcom cham dawn leh dawn loh a ni a, club thuneituten a cham tur thu min tiam avanga inbiakna pawh neih chhunzawm thei chauh kan ni," tiin Brazilian forward dinhmun a sawi.

Bordeaux club president Stephane Martin chuan, "Vawi tam kan sawi tawh a, Malcom hi a chhuak lo ang. Ni e, Premier League-a khelh a chak thu kha vawi khat a sawi ve a ni mai a, chu chu thil awm lo pawh a ni lo. England-a inkhelh duh loh player an awm dawn em ni?" a ti.

Kum 20 mi forward hian January 2016 khan Corinthians aṭangin Ligue 1 club hi a zawm a, match 80-a khelh tawhah goal 18 a khung sak.