Mittui nen Norde a liam
Mohun Bagan ṭantute atchilh rawn leh player hmuhnawm Sony Norde chuan a hliam dam theih loh avangin Kolkata club-a a contract neihlai chu a ti tawp a, Thawhṭanni khan club hmunpuiah fan-te hnenah thlahna thu a sawi–nimin khan a inenkawlna tur hmun Argentina a pan nghal.
Norde chuan, "Ka dam leh ve leh he club-ah bawk hian ka rawn kir leh ang tih ka tiam che u a ni. He hmuna hmangaihna ka dawn zawng zawng hian Mohun Bagan hi ka club khelh tawhnaah chuan min ngaihhlut tir ber a, vawiinah pawh hian chhuah hreh viau mah ila, ka chhungte leh ka career ngaihtuah chunga thutlukna ka siam a ṭul a ni," tiin mittui nen Bagan a mangṭha.
Hliam chu
Haiti internatioanl hian I League leh Indian Super League khelh kawp theih a nih loh hnuah pawh ISL club aṭangin sawmna hmu nual mah se Bagan-a cham chhunzawm a thlang a, Kolkata club-ah hian season khatah nuai 250 vel a hlawhah ngaih a ni.
Bagan fan-ten an player chhuanvawr an chelh theih avangin an hlim a, Haitian winger hi kut phar chungin an lo lawm–mah se, Norde-a'n tun season-ah league match li bak a khelhsak lo. December 10-a Churchill Brothers nen an inkhelh ṭumin a inhliam a, lakchhuah a ni.
Beisei loh lam
Mohun Bagan fan-ten beiseina sang tak nen Norde an thlir reng a, Churchill laka a inhliam hnua an match hmasa berah Shillong Lajong nen inlan lo mah se Neroca lakah a inlan lehnghal. Mahse, Manipur club lakah hian Norde-a'n minute 84-a khelh hnuah lakchhuah a ni a, a hnuah khelmual a rap leh tawh lo.
Haiti tan vawi 27 inlana goal hnih khungtu hi a hunlaia coach Sanjoy Sen-a'n a khelh luihtir nia sawi a ni a, Manipur club kha hmachhawn lo se chuan tun aia hmaa a dam a rinawm thu thlengin sawi a ni. Mahse, Norde chuan, "Team-in min mamawh nia ka hriat avangin ka khel lui a, tumahin minti lui lo," tiin a sawifiah.
Thurawn chu
January 21-a Kolkata derby khelh a nih hma khan Norde-a'n inkhel boruak sanga a hmel lan ngei tumin January 18 khan training a zawm a, mah se a khup na ngai bawk ti na nawn lehin training a chhunzawm lo.
Boca Juniors B team player hlui chuan, "Ka doctor ka rawn a, ani chuan ka khup zai a ngaih tur thu leh kar sarih tal inenkawl ka ngaih tur thu min hrilh. Kha zanah khan ka mu thei lo reng reng a, ka ṭhiante khan derby khel turah vek min ngaih avangin a tukah chuan an hmel pawh ka hmu ngam lo," tiin a hliam serious thu an hriatchhuah dan chungchang a sawi.
Mangṭha le Bagan
Thawhṭannia Norde thlahna inkhawmah Mohun Bagan fan-ten an player ngainat hi mittui nen an thlah a, club official pawh an bang bik lo. Kolkata club tana I League leh Federation Cup nomawi chawitu forward chuan, "Ka ṭhiante u in theihna zawng zawng nen he team tan hian khelmualah khel zel ula, match tinah hnehna chan tum ang che u," a ti.
Norde chuan sawi zawmin, "Min ṭantute ṭap hmel hmuh kha hrehawm ka ti em em a, ka tiam duh che u chu hei hi a ni. Ka dam veleh ka lo kir leh ang, hei hi club hnen aṭanga hmangaihna ka dawn ka pek let theih dan chu a ni," tiin a sawi.
Norde thlaktu?
Mohun Bagan hian beisei phak lo Ansumana Kromah an chhuah zalen tir hnuah a hmun ruak luah turin Akram Moghrabi an lalut nghal a, Kolkata derby-ah Lebanon international hi an la sual lo tih a lang chhuak nghal–Ningania Aizawl FC nen RG Stadium-a an inkhelh hunah Lebanese midfielder hi hmuh turin a awm ang.
Bagan hian Ethiopian striker Fikru Teferra chu indawrna an neihpui avangin season khata nuai 40 hlawhtu Aser Dipanda Dicka an chhuahtir dawn nia sawi a ni a, mah se Cameroon striker hian Derby-ah goal hnih ngawt a khung avangin an chhuahtir a rinawm tawh lo–Fikru hi Norde thlakna tura an lak a rinawm tawh zawk.