Novak Djokovic tan a na

Novak Djokovic chuan Australian Open champion hnem ber nih theihna hun ṭha a nei a, mahse player langsar ni lem lo Chung Hyeon a hneh loh avangin last 16-ah a zinkawng a tawp. Serbian tlangval Djokovic hian a hliam neih fo vanga a buaina chu manganthlak a nih thu a sawi.

Grand Slam vawi 12 champion tawh Djokovic hi a kiu dinglam na vangin a buai reng a, thla ruk hnuah inelna a hmachhawn ve leh chiah a ni. South Korean tlangval Chung a hneh loh hnuah Djokovic hian a kiu bakah a khel bawrah hliam a nei.

Kum 30 mi Djokovic chuan, "Hliam a dam theih nan hun rei tak ka nghak a, chumi hnuah pawh beisei ang a nih theih loh chuan a lungngaih thlak hle, mahse kan chunga tla a nih chuan kan pawm a ngai miau si," a ti.

Sawi zawmin Djokovic chuan, "Training nuam ka ti a, zawimuanga hma ka sawn zel a nih chuan tun hma anga ṭha kha ka nih leh theih ka beisei, inelna takah pawh ṭha takin ka kir leh ang," tiin beiseina a la neih thu a sawi.

Djokovic hi kum li chhung ngawt world number 1 ni thei a ni a, mah se a inkhelh mumal lohna a rei tawh avangin ranking-ah number 14-naah a tla hniam tawh. A elpui player ṭha ṭhenkhatin hma an sawn a, player naupang zawk an chawr chhuah ve mek bawk avangin tunhma lama a ropuina ang nei let tur chuan a hna a awlsam tawh dawn lo hle.

Season hmasa aṭanga hliam vanga buai player langsar dang Andy Murray chu Australian Open-ah hian a inlan lo a, Grand Slam vawi thum champion tawh Stan Wawrinka pawh Melbourne-ah hian inlan mah se match khat bak a chak lo.