Copa America champion Argentina
Argentina chuan Angel di Maria goal khat hmangin Brazil 1-0 in an hneh a, nimin zing khan Copa America nomawi an chawi. South America ramte inelna lian leh sang berah vawi 15 an hlawhtlinna niin, record nei ṭha ber Uruguay an nih rual.
La Albiceleste hian 1993 khan Gabriel Batistuta hoin Copa nomawi an chawi, a hnu lamah erawh an awl rei vang vang hle. Kum 28 zet an nghah hnuah Lionel Messi hoin hlawhtlinna an chang ve leh ta.
An ṭha tawk
Brazil coach Tite-a'n knock-out stage chinah chuan a player rin ngai a hmang rim. Semifinal-a Peru hnehtute kha final-ah pawh a hmang nawn vek, hrem vangin striker Gabriel Jesus erawh an la chhawr thei lo.
World champion vawi nga ni tawh hian Neymar, Everton Soares leh Richarlison te tlarhma lamah an dah, an squad chhahzia tichiangtu chu Liverpool player ṭha - Alisson Becker, Fabinho leh Roberto Firmino te chu bench lamah an la dah thei.
Argentina coach Lionel Scaloni erawhin Colombia hnehtu team aṭangin player panga ngawt a siksawi. Tlarhnung laiah Atalanta defender Cristian Romero a lo kir thei tawh a, winger Di Maria bakah - Gonzalo Montiel, Marcos Acuna leh Leandro Paredes ten bul an ṭan.
Goal khat a tawk
Maracana Stadium, Rio de Janeiro-a inkhelah Argentina lamin bul an ṭan ṭha zawk a, a tir lamah chuan ball an chang tam - hun ṭha erawh an insiam thei mai lo. Brazil tlarhnung laiah Thiago Silva leh Marquinhos te an awm avangin a awlsam lo.
Minute 22-naah midfielder Rodrigo De Paul-a'n hla taka awm Di Maria a hmu fuh, through ball ṭha bik a pek chu Ateltico Madrid defender Renan Lodi-a'n a chhutsual, a dan phak tura a ngaih a tawk phak lo chiah.
Paris Saint-Germain winger Di Maria-a'n ball la fuhin a tlanpui zui, keeper Ederson-a'n nanchin hman beiseiin rawn tlan hma mah se mawi zetin a lo 'chip' khum a, goal pawimawh leh awmchhun ni turin a lut.
Scaloni nauten goal khung belh ai chuan an neihsa venhim an thlang zui. Messi-a'n thui tak ball a tlanpui hnuah goal zawnah a pet thei lo a, hun tawp dawnah khung belhna remchang nei mah se Ederson bum kher a tumna lamah a hlawhtling ta lo.
Brazil vanduai
Tite-a'n inkhel chawhma lama beisei phak lo Fred la chhuakin Firmino a dah lut a, an goal nawr a na sawt. Everton forward Richarlison-a'n amah vengtu paltlangin siphurh sutah a inngai, mahse offiside vangin an hnawlsak.
Real Madrid duhlai Vinicius Junior luh hnuah an goal nawr a na zual, amaherawhchu keeper Emiliano Martinez an paltlang thei lo. Colombia laka Argentina chhanhimtu hian hnai taka Gabriel Barbosa khung tur chu ṭha zetin a lo dang.
Tlarhnung laiah Nicolas Otamendi leh Romero an din ngheh avangin mual sir aṭangin Brazil lamin thapui an thawh, an thiampuipa Neymar-a'n hun thawl ṭha insiam tum ṭhin mah se an hnaihchilh hman zel a, goal hlauhawm a nei thei lo.
Anmahni ramah, an stadium chhuanvawrah ngei an hmelma ram hneh loin Brazil an tlawm a, a na khawp ang. Mahse, Tite-a'n nakkum World Cup thlir chungin team a din tih hriat a ṭha, an squad chhah dan ngaihtuahin hlawhtlinna lian zawk an la beisei ngam ang.
A hlen chhuak ta
Hamrik hnuhnung a rik rualin lawm avangin a ṭhingṭhi a, a hnuk a ulh tih chu phat rual a ni lo. A ṭhianten Lionel Messi-a lawmna an ṭawmpui a, khawvelin football thiam hmingthang bik Messi leh an ram hlawhtlinna an lawmpui.
Argentina tan Messi-a'n nomawi lian tham a hlawh chhuak ta. Barcelona tan chawimawina tinreng dawng tawh mah se a lawm a kim thei ngai lo, tunah erawh an ram tan Copa America a chawi tak avangin a duhthusam a kim ngei ang.
"Thilmak duhawm, hei zet chu a ropui e! Champion kan ni ta, Lalpa kan lawm e," tiin Lionel Messi chuan ram tana an hlawhtlinna chungchang a sawi a, kum tam tawh lama hlawhtlinna a nih bakah ram tan a nih miau avangin a hlutna a sang zual tih a hriat.
Kum 34 mi Messi hian tun hmain FIFA World Cup final vawi khat bakah Copa America final vawi thum a khel tawh, a chak lo lamah a ṭang vek. Tun ṭumah erawh mimal chawimawina hrang hrang nen hlawhtlinna changin, ringhleltute lakah hnehna hlado a chham ta a ni.
Goal leh assist ngah ber
Lionel Messi kutah Golden Ball leh Golden Boot hlan a ni a, player ṭha ber lawmman hi Messi leh Neymar ten an indawn ṭawm. Argentina keeper Emiliano Martinez hnenah Golden Glove pek a ni bawk.
La Albiceleste captain Messi-a'n goal li khungin a ṭhiante khung tur vawi nga a siamsak bawk, mimalah chuan ani aia goal thawk chhuak hnem an awm lo - knockout stage chinah chuan final match tih lohah chuan goal emaw assist emaw a nei ziah.
Brazil thiampuipa Neymar-a'n goal hnih a khung a, a ṭhiante thun tur vawi thum a siamsak. PSG forward hian goal a khung hnem tawk lo, mahse an khingpui chhaih buaitu leh an goal nawrna thahrui pawimawh ber a ni. South America football thuneitu sang CONMEBOL chuan, "A ṭha ber kha pakhat chauh thlan chhuah a harsa, tun inelna bikah chuan lawmman dawn phu khawpa ṭha pahnih an awm. Team tana pawimawh leh innghahna ve ve an ni bawk.
"Khelmual chhung leh a pawnah team tana an pawimawhna a sang a, an goal khung leh assist neih mai bakah an ṭhiante tana an ṭangkai dan chhut hian an phu, inelna sang leh thiamthil hmuhnawm bik min chhawp chhuahsak," an ti. Goalkeeper ṭha ber lawmman dawngtu Martinez tan chanchin lawmawm bik a ni. Inkhelh tam a duh avangin Arsenal a chhuahsan a, a club thar Aston Villa tan season duhawm a hman avangin ram tana khel tura koh a ni.
Hri leng vangin Franco Armani a inlan thei lo a, khel phak lo zawk tura ngaih Martinez tan vanneihna a inhawng. Semifinal-a Colombia an hneh ṭumin penalty vawi thum ngawt a dang a, goal khung thiam Brazil lakah goal venghim lehin an ram a hlawhtlinpui.
