Wimbledon champion Barty
Ashleigh Barty chuan Karolina Pliskova hnehin Wimbledon title a la. World number 1 hian inelna neih ṭan hma khan All England Club-ah hlawhtlin a chak thu a sawi a, tunah chuan a duhthusam a hlen chhuak ta.
Inrinni zan hmeichhe singles inkhelah Barty hian Pliskova hi 6-3, 6-7(4), 6-3 in a hneh, hnehna chang tur hian darkar khat leh minute 56 a hmang, set thum khel mah se hun an hmang rei lutuk hran lo.
Hnehna chu
Beisei leh rin angin inelna result a thleng vek lo a, final khel pahnih hian tun hma lamin Wimbledon final an la khel phak ngai lo. Centre Court-ah beiseina sang tak nen an lut a, an chhuak lam erawh an dinhmun a inang thei ta lo a ni.
Seeded pakhatna Barty hian clay leh hard court chunga a ball vuak na tak ang kha grass-ah a chhawm thei a, aces vawi sarih siamin a bal vuak na chu a ṭhat pui, harsa vak loin set khatna pawh a la.
Mahse, set hnihnaah service nei ṭha Pliskova a tlawm duh bik lo. Tie break thlen puiin set a la ve a, a hnuhnung berah erawh player ṭha zawk Barty dan theih a ni lo - Australian star hian match point a hmuh hnuah hawi kir loin a tlang.
Kum 50 hnuah
Wimbledon-ah hian Evonne Goolagong Cawley chuan kum 41 liam ta khan nomawi a lo chawi tawh, ani hnuah hian Australian nula zingah Wimbledon title la thei hi an awm lo vang vang a, tunah chuan Barty hun a thleng ve leh ta chiah.
Kum 25 mi Barty chuan, "A makin a ropui, hetiang hun tawng tur hian tun hma aṭangin ka lo suangtuah char char tawh ṭhin. A nihna takah chuan Centre Court-ah final ka khelh vawi khatna a ni a, final khelh hma zan kha chuan ka helhhawlh vangin ka mu hleithei lo.
"Final en tura lo kal zawng zawngte hian ka hun tawn ropui chu a takin min tawn pui a, in chungah ka lawm takzet," a ti. Barty hian French Open nomawi a chawi tawh a, tuna a champion leh avangin major title pahnih a nei tling ta chiah.
Thil mak
May thla tawpa khelh French Open-ah khan Barty hi a hliam, a chawn hliam vangin clay court inelna lian aṭangin hrehawm ti tak chungin a inhnuhdawh a ngai hial - ni 37 a liam hnuah chuan Wimbledon champion a ni thei.
Barty chuan, "Ka team-te khan ka tana ṭha turin thil engkim an ruahman, ka chak loh theih dan ai chuan engtiangin nge ṭha taka ka khelh theih ang tih chauh kan ngaihtuah, hun rei lote chhunga na nei loa ka khel thei hi a mak zawk hle," a ti.
Kum 10 liam ta khan Barty hian Wimbledon junior title hi a lo la tawh, mahse senior huangah erawh beisei a phak lo ṭhin; kumin bakah hi chu third round paltlang a la nei ngai lo. Player ṭha ni mah se kuminah hian rinkai a ni lem lo, a duhthusam thlen kum erawh a ni thung.
Nghah a la ngai
Player ṭha bik zinga mi a ni a, theihna pawh a nei sang - a bik takin a service ṭha tak hi khingpuite tana hmachhawn harsa a ni ṭhin. Mahse, Pliskova hian Grand Slam huangah hlawhtlinna a la chang thei lo. Wimbledon hma hian US Open (2016) final-ah a tlawm bawk.
Kum 29 mi Pliskova chuan, "Ka ṭap ngai lo, tunah pawh ka ṭap lo ang a, nakinah pawh ka ṭap lo ang. Tennis court hi ka tan chuan ṭahna tur a ni lo tih hi ka ngaihdan a ni a, hmun dangah erawh chuan ka sawi thei lo.
"Mi pahnihin hlawhtlin tumin theihtawp kan chhuah a, a tawpah pakhat zawk chauh a chak thei. Kei chuan chak loha awm dan ka thiam tawh," tiin chak lo mah se a pawm thiam thu a sawi, engtik niah emaw chuan a tan hun ṭha a la her chhuak ang.
Mipa Singles Final
Nizan khan Wimbledon mipa singles final khelh a ni a, world number 1 Novak Djokovic leh Matteo Berrettini ten nomawi an inchuh a, chanchin buatsaih lai hian result kan hre hman lo.
Zirtawpni zan khan semifinal khelh niin, seeded pakhatna Djokovic hian player ṭha Denis Shapovalov chu 7-6 (7-3), 7-5, 7-5 in a hneh. Inkhel dangah Matteo Berrettini chuan Hubert Hurkacz chu 6-3, 6-0, 6-7 (3-7), 6-4 in a lo hneh ve bawk.
Italian tlangval Berrettini tan Grand Slam final hmasa ber a ni a, a khingpui Djokovic erawh Grand Slam title 20-na beiseitu a ni thung. Serbian star hi a champion a nih chuan major title lak hnem lamah Roger Federer leh Rafael Nadal (20 titles) a nih rual chiah ang.
