A hliam a sin, mahse Argentina tan a khel lui

"Ka tan a ni ve lo a ni ang, ka tum a, mahse kan hlawhtling si lo," tiin Copa America final an khelh hnuhnunga an chak loh ṭumin a sawi a, tunah chuan tih theih loh leh harsa tak nia lang kha Lionel Messi-a'n a hlen chhuak ta.

Kum 34 mi a ni tawh a, atan chuan Copa America hnuhnung ber a ni tawh mai thei. Nakkuma World Cup an khelh hunah chuan kum 35 mi a ni tawh dawn, ram tana a hun ṭha hnuhnung lama hlawhtlinna a chan hi a lawmawm zual ngei ang.

Hliam chungin
Brazil hneha an champion hnuah Argentina coach Lionel Scaloni-a'n a captain chuan hliam nei chunga final a khelh thu a sawi a, dam chiang lo mah se ram tan hlawhtlinna chan ngei tumin a bei tihna a ni.

Colombia nen semifinal an khelh ṭumin Messi hian a kheimitah hliam a tuar, an khingpui lamin yellow card panga an hmuh chu Messi laka an chawi vek a ni a, a ke aṭanga thisen chhuak chungin a khel tluan.

Scaloni chuan, "Copa America a khelh dan chanchin kimchang hi i hria a nih chuan, i ngainatna a zual ngei ang. A nihna tak sawi chuan semifinal leh final-ah khan 100% fit a ni lo, mahse ram tan huaisen takin a pen chhuak.

"Final a khelh hmasak paliah a chak lo, mahse khang inkhelah khan a tlawm miau loh avangin a bei chhunzawm zel a, tunah chuan a duh chu a hlawh chuak ta," tiin Messi vanga Copa America champion an nih thu a sawi.

A ṭha ber?
Pele leh Diego Maradona ropuizia inhrilh nawn a ngai lo a, tunlai khawvela Messi leh Cristiano Ronaldo ropui bikzia pawh sawi nawn a ngai awm lo e. Ram tana nomawi a chawi tak avangin Messi-a ṭantuten a chanchin sawi nuam an ti zual ngei ang.

Messi hian Barcelona tan La Liga nomawi 10, Copa Del Rey pasarih leh Champions League nomawi pali a chawi tawh; Copa America a neih belh tak avangin a buk a rit belh ngei ang - mimal chawimawina sang Ballon d'Or a dawng leh a nih pawhin a mak lo ang.

Argentina coach Scaloni chuan, "Copa America kan champion emaw, kan champion lo emaw pawh ni se Leo hi khawvela player ṭha ber a ni tih a chiang tawh a, he hi chu kan khingpuite pawhin min ṭawmpui," tiin a sawi.

Scaloni thusawi hi mi tam takin an ṭawmpui ang, mahse ṭawmpui lotu pawh an tam ang tih a chiang. Chiang taka sawi theih erawh Messi hian player ṭha leh ropuiin an tih tur ang zawng zawng chu a ti zo tawhah a ngaih theih.

Ṭhian ṭha an ni reng
Chak an awm chuan chak lo zawk awm a ngai. Lionel Messi-a'n final-a chak lo zawk nih hrehawmzia a hrechiang tawh a, hlima an lawm viau laiin an hneh tak Brazil forward Neymar chu a hnem.

Messi leh Neymar hi Barcelona tan hlawhtling takin an lo khel dun tawh. Neymar hian khawvela player manto ber ni turin Paris Saint-Germain a pan san a, sum hlawh chhuak hnem mah se Paris club tan a beisei ang hlawhtlinna a la hlawh chhuak tawk lo.

Kum 29 mi Neymar hi a vanduai vek bawk, an ram tan Rio Olympic-ah khan gold medal a la, mahse Copa America champion an nih ṭum erawhin hliam vangin a khel thei lo - ram tan nomawi lian tham a la chawi lo tihna a ni. Tunah la hlawhtling lo mah se Neymar erawh a kum a la tlem a, hlawhtlin theihna hun ṭha a la nei tura ngaih a ni. Nakkum World Cup hi hliam nei loa a khel thei a nih chuan a vanglai tak a ni dawn, a hmuhnawm ang.

Video Call kha...
Champion lawmin an lam a, a ṭhiante leh coaching staff-te nena an lawmna karah Lionel Messi chuan in lam aṭanga lo entu a nupui fanau te a hre reng a, khelmual chhung aṭangin video call hmangin a bia.

Messi hian a nupui Antonela Roccuzzo leh a fate hmuh lain a medal dawn a fawp a, lawm avanga boruak hnekin a hmelah lawmna a luangliam - a mak lo e, a duh ber ram tan nomawi a chawi tawh miau a. Hri leng vangin Copa America hian buaina an tawk. A tirah chuan Argentina leh Colombia te inthlen ṭawm tur a ni, mahse hri leng vangin ram pahnih hian an thleng thei lo a, chawpchilh takin Brazil kutah an nghat.

Brazil hian a thleng zui a, an ramah hri leng a tam avang erawh chuan inkaihhruaina pawh a khauh hle. A hmunah inkhel entu an awm thei lo a, final pawh hi a hmunah mi tlemte chauhin an en - Messi chhungte pawhin a hmunah an en thei lo a ni.

Nomawi hlu tak a ni, a bik takin kan ram mipui tan a hlu zual ngei ang. Mipui aṭangin thlawpna kan dawng ṭha em em a, anni hian tute ngei beidawng loa bei hram hram ṭhin tih chu an hria. "Copa America hi khelh a lo ni fo tawh, tun hma lama mi chu sawi vek theih ni lo mah se tun ṭuma mi hi a harsa ber a ni mai thei. Hri leng vangin kan buai a, inbuatsaihna hun a tlem bawk - a thlengtu Brazil team an ṭhat em avang ringawt pawhin champion hi a hlu.
- Lionel Scaloni, Argentina Coach