Poirier hmaah McGregor a tlawm nawn - a hun a zo tawh?

Conor McGregor-a'n UFC 264-a Dustin Poirier nen an inhnek hmain a khingpui chu zawn chhuah a ngaih tur thu a sawi a, amah zawk zawn chhuahin a awm thung!

Nimin zing khan Las Vegas khaw-puiah fighter pahnih an intawng a, round khatnaah McGregor hian a ke ruhah hliam a tawrh avangin doctor-in fight chhunzawm a phal lo - technical knockout hmangin Poirier chu chak zawkah puan a ni.

McGregor-a'n a tlawm hnuah, "Tun hi a tawpna a la ni lo," tiin pawr takin a sawi a, mahse, fight en chuan inhliam lo pawh ni se Irish fighter dinhmun a ṭha lo tih an hmu ang.

UFC president Dana White chuan, "A chawn vei lam ruh a tliak a ni," tiin McGregor-a dinhmun a sawi a, kum 32 mi fighter hian octagon chhung lut leh tur chuan a nghah rei hret a ngai ang.

Fight hmuhnawm chu
T-Mobile Arena-ah mipui 20,000 zet an pungkhawm a, March 2020 hnua UFC-in Las Vegas khawpuia stadium khata entu awm chunga fight a huaihawt leh hmasak ber a ni.

Fighter pahnih hi a vawi thum nana an intawn leh hma hian ṭawngkam na tak takin an inbei a, ring chhung an pan dawn pawhin fans thawm a ṭha ham ham hle - fight hmuhnawm tak hmuh an beisei.

McGregor-a'n rin loh takin a ke a rawn hmang tam a, fight ṭan a nih rualin na taka Poirier pet fuh tumin a pet chhuak deuh reng a ni ber a, Irish fighter-in fight a hmachhawn ṭhin dan hmu ṭhin tan a chuan a mak hle.

Mahse, kum 32 mi Poirier-a'n tawnhriat a nei ṭha tawk tawh tih pholangin a chi ai duh lo a, dawhthei takin McGregor a nawr theih hun tur a nghak.

A bet ta
Poirier-a'n a dawhtheih rah a seng a, McGregor lakah a kuttum lek chhuakin 'fight' tak takah an lut chho a, mahse, McGregor hian a tawnhriat lo chhawr ṭangkai ve lehin Poirier hi a luah a kuah nghet tlat.

McGregor-a'n a kuah nghet a, tam tak tan chuan Poirier hi a tlawm mai dawn emaw tih hman tur a ni - mahse, American fighter hi a chi ai duh miah lo a, talchhuah dan tur a zawng.

A tawpah Poirier a tal chhuak thei a, American fighter hi a talchhuak satliah lo - a kiu leh kuttum hmangin McGregor a deng zui a, Irish fighter a talbuai zui.

Fighter pahnih an thawh hnuah inhnek fuh tumin kuttum an lek chhuak leh a, McGregor a tlu - Poirier-a'n a kuttumin a deng a, Irish fighter tana vanneihthlak takin first round a tawp zui.

A inhliam!
Poirier-a'n McGregor bawh chunga a hnek hma hian Irish fighter hian a ke ruh hi a ti tliak hman a, inven tuma a tawlhhnunna lamah a ke chhep sualin a ruh hi a tliak.

McGregor-a'n a ke a kawk zui a, chhuanlam a nei ṭha - doctor lamin uluk taka an en hnuah inhnek chhunzawm chiah an ngai lo a, Poirier zawk chu chakah puan a ni.

Poirier-a'n round khatna hi chu a thunun hrim hrim a, UFC fighter zingah hausa ber McGregor hi sum a ngah hnuah a inthunun tawk lo niin a lang - a ṭawng a la pawr reng a, octagon chhunga a chet danin thawnthu dang min hrilh thung.

McGregor-a'n thinrim takin an fight chu a tawpna a la nih loh thu a sawi a, he fighter hian Poirier hmachhawn leh ngei a duh dawn niin a lang - tuna a tih tur hmasa ber erawh a 'ke' enkawl dam phawt a ni.

Ṭawng tlem la...
Fighter pahnih intawn hmain McGregor a ṭawng pawr takzet a, fight a zawh meuh chuan Irish fighter la pawr viau mah se bengkhawn a hlawh lo a, Poirier-a'n pawr takin a tih el ve ta thung.

American fighter chuan, "McGregor khan he octagon chhungah hian min thah tur thu leh, kuanga zalh chunga ka chhuah tur thu a sawi a, khatianga midang chungchang sawi kha thil ṭha a ni ngai lo.

"A nupui fanau duhawm takte hnenah him dam taka a haw ka beisei a ni," tiin a fighter hneh tak a thlah a, ṭawngkam mawi tak niin lang mah se McGregor tan erawh dawnsawn a nuam lo ang.

Poirier chuan McGregor-a ke ruh tliak chu, "A tirah khan a ke kha a tina nghal a ni," tiin Irish fighter chuan amah a petna lamah a ke chu a tihliam a nih thu a sawi.

Hmachhawp chu
Poirier-a'n vawi 35 fight-a hma-chhawnah vawi 28 hnehna a chang ta a, vawi ruk tlawmin vawi khat chu a khingpui chet dan avangin 'no contest' ah puan a ni - tuna a hmabak chu UFC lightweight title a ni a, he kawnghren kawl mektu Charles Oliveira chuan fighter pahnih inhnek hi a hmunah a en.

McGregor hmabak erawh sawi thiam a harsa hle - a hmasa berah chuan a hliam enkawl dam phawt a ngai. UFC-ah chuan star lar ber a la nih miau avangin an chan phal lo ang tih a chiang a, chutihrual chuan fight a hmachhawn hnuhnung pasariha vawi li ngawt submission leh technical knockout hmanga tlawm fighter tan lightweight belt beisei tur chuan fighter ṭha a hneh leh phawt a ngai.

UFC lama a ngam loh hmasak ber Nate Diaz hming a ri a, "BMF" champion Jorge Masvidal sawi rik a ni bawk - UFC 196-a a hmachhawn tura an lo tih tawh, hliam vanga inhnukdawk Rafael dos Anjos hmachhawnna chance a awm bawk.

Floyd Mayweather nen an inhnek avanga nasa taka a hausakna pung ta McGregor hi boxing lamah a kir mai thei bawk. January-a Poirier a hneh loh hmasak hmaa an sawizawm pui Manny Pacquiao hming lam rik a ni leh tawh a, Mayweather nena 'rematch' chance a awm nia sawi a ni a, YouTuber Jake Paul chuan boxing-ah a lo cho ve chhen bawk - a uaithla tawh tih a lang chungin sum hmuhna tur chu a la nei ṭha hle.