England-in Pakistan an hneh

Inrinni khan England-in ODI match thum khelh tura a vawi hnihnaah Pakistan 52 runs-in an hneh a, 2-0 in hma an hruai. Lords-a inkhel hi ruahsur vangin over 47-ah tihhniam a ni a, mualneitu hi talbuai lai neiin 160/7 te ni hman mah se run over 45.2-ah run 247 an siam.

Pakistan tan target awlsam a ni lo a, England bowler-te an chet ṭhat bawk avangin over 41-ah run 195 siamin an thi vek. ODI match tawp ber hi July 13, Thawhlehni tlai dar 5:30-ah an khel ṭan ang a, July 16 aṭangin T20 match thum an khelh tura a hmasa ber an khel lehnghal ang.

England hi Covid-19 vangin an buai a, an match hmasa bera ram tana vawi khat khelhna mi panga an nei chungin hnehna an chang. Match hnihnaah pawh player ngai bawk rin an ni.

Ṭhumvawrah Pakistan an chak a, bat hmasak an thlang. Phil Sat-a'n run 60 a siam bakah James Vince (56) leh Lewis Gregory (40) te England tan an che ṭha a, Pakistan bowler Hasan Ali-a'n run 51 pein wicket nga a la bawk.

Pakistan bat hun a thleng a, top order-te an chet ṭhat tawk loh avangin an talbuai. Middle order batsman Saud Shakeel-a'n run 56 siamin chak turin beiseina rawn nei mah se England bowler lakah an thamral. Mikhual team hi over 41-naah an thi fai vek a, run 195 chauh an siam avangin run 52-in an chak lo.