Nagelsmann-a'n Olmo leh Chiesa te a duh

Bayern Munich manager thar Julian Nagelsmann chuan RB Leipzig-a a player Dani Olmo leh Euro 2020-a Italy player pawimawh Federico Chiesa te Bavarians-a lakluh a duh.

Season liam ta khan Olmo hian Leipzig tan inelna hrang hrangah match 46 khelin goal nga khungin assist vawi 10 a nei. Kum 23 mi Olmo hian Euro 2020-ah Spain tan a khel ṭha a, match nga an khelhah minute 379 inlanin assists vawi thum a nei.

Amaherawhchu Olmo hian Leipzig-ah kum 2024 thleng contract a nei a, release clause hi euro maktaduai 80 daih a ni. Bayern hian Leipzig aṭangin Dayot Upamecano (€42.5m) bakah free transfer-in defender Omar Richards leh keeper Sven Ulreich an lak tawh avangin Nagelsmann duh hi an tihhlawhtlin theih a rinawm.

Juventus pawhin Federico Chiesa hi hralh an phal lo a, manager thar Massimiliano Allegri hnuaiah player pawimawh a ni ang. Season liam ta khan Old Lady hian Andrea Pirlo hoin Serie A nomawi an chawi thei lo a, kuminah chetsual nawn an tum lo.

Italy captain Giorgio Chiellini pawhin kum khat dang contract a ziah belh dawn a, tunkar chhoah an ti fel ang.