Season tharah Real tana khelh ka duh - Ceballos

Dani Ceballos chu Spain tan Olympic Games-ah a inlan dawn a, Spanish midfielder hian season tharah Real Madrid tana khelh a tum thu a sawi.

Real Madrid midfielder Dani Ceballos chuan, "Real Madrid-ah kum hnih contract ka nei a, hlauhthawnna tur a awm lo. Olympics zawhah club nen kan indawr dawn a, chutah chuan a chiang ang. Real Madrid tana khelh ka duh a, chutihrualin coach duh dan leh tum dan kan hriat a ṭul bawk," tiin a sawi.

Real Madrid coach thar Carlo Ancelotti hian Napoli a enkawl lai khan Ceballos hi lak a lo tum tawh a, hemi a nih avang hian Los Blancos-ah hian khelh a inbeiseiah a ngaih theih.

Spanish club hian Ceballos hi euro maktaduai 30-a hralh an pawiti lo tih a awm a, chutihrualin hetiang zat pawisa hian Ceballos anga ṭha player lak tur an awm a rinawm loh avangin an chhawr mai a rinawm bawk.

Kum 24 mi Ceballos hian season hnih chhung Arsenal tan a khel tawh a, league-ah match 24 leh 25 khelin goal a khung lo ve ve. Chutihrualin Gunners tan hian inelna hrang hrangah match 77 khelin goal hnih a khung.