South America-a inelna lian ber Copa America

Copa America chu hi kum 1916 khan Argentina-ah khelh ṭan a ni a, hetih lai hian ram pali chauh an la tel a, a hming pawh South American Championship tih a ni.

Copa América hming a put ṭan chu kum 1975 a ni a, hemi kum hian team 10 telin Peru an champion. Inelna hrim hrimah erawh Argentina leh Uruguay te vawi 15 ve ve champion tawhin nomawi an chawi ngun ber.

Record nei ṭha
Argentina hian 1993 hnuah kuminah nomawi an chawi a, vawi 15 an champion tawh bakah semifinal-ah ṭum 36 zet an lut tawh. La Albiceleste hi pahnihna vawi 14 an ni tawh a, pathumna vawi nga an ni tawh bawk.

Uruguay chu kum 2011 khan a vawi 15 nan an champion a, semifinal hi ṭum 35 zet an lut tawh. La Celeste hi pahnihna vawi ruk ni tawhin pathumna vawi kua an ni ve tawh bawk.

South America ram zinga FIFA World Cup-a record nei ṭha ber Brazil erawh Copa America-ah record nei ṭha pathumna an ni pha chauh. Selecao hian vawi 31 semifinal an lut tawh a, vawi kua champion tawhin vawi 12 pahnihna an ni a, pathumna vawi sarih an ni tawh bawk.

Goal khung tam

Copa America history-a goal khung tam ber chu Argentina inside forward hlui Norberto Méndez leh Brazil attacking midfielder hlui Zizinho te an ni a, goal 17 ve ve an khung.

Norberto hian 1945–1956 chhung khan Argentina tan a khel a, Copa America-ah an ram hi 1945, 1946 leh 1947 khan a champion pui. June 22, 1998 khan kum 75 mi niin a thi.

Zizinho hian Copa America nomawi vawi khat chiah a chawi a, 1949 khan Brazil hi a champion. Kum 1942–1957 chhung ram tan a khel a, February 8, 2002 khan kum 80 mi niin a thi.

Player khel lai zingah chuan Peru striker Paolo Guerrero leh Chile forward Eduardo Vargas ten an khung tam a, player pahnih hian goal 14 ve ve an khung.

Kum 37 mi Guerrero hi Bayern Munich academy chhuak a ni a, Internacional tan khel mekin Peru tan match 104-ah goal 38 a khung. Kum 31 mi Vargas hi Serie A club Napoli tan a khel tawh a, Atlético Mineiro tan a khel mek. Chilean forward hian ram tan match 100 khel tawhin goal 40 a khung.

Lionel Messi pawh record nei ṭha zingah a tel a, goal 13 a khung tawh. Hetiang zat goal khung dangte Ademir (Brazil), Gabriel Batistuta (Argentina), Jair (Brazil), Jose Manuel Moreno (Argentina) leh Héctor Scarone (Uruguay) te an ni.

Record dang
Copa America-a inlan tam ber chu Uruguay a ni a, vawi 45 an inlan. La Celeste hian match 203 an khel a, match khel tam ber an ni bawk.

Champion tam ber Argentina hian vawi 124 hnehna an chang tawh a, chak ngun ber an ni. Chile erawh vawi 87 an chak lo a, chak lo ngun ber an ni thung. Paraguay-in vawi 41 an khingpui an draw a, inhnehtawk ngun ber an ni thung.

Attacking football khel ram Argentina-in goal 465 an khung a, Copa America-ah goal an khung tam ber. Ecuador-in goal 323 an chhuah a, goal chhuah tam ber an ni.

Pele leh Maradona ten Copa America nomawi an chawi lo
South America hian player ropui bik an kawl tawh ṭhin a, an la kawl zel bawk. Brazil chhuanvawr Pele leh Argentina ngaihsan rawn Diego Maradona te hi mi ṭhahnem takin khawvel player ropui berah an ngai a, tunah pawh Lionel Messi an nei. Argentina captain Messi hi ropui bera ngaitu an tam hle.

Messi hian kum 34 mi a nih hnuah Argentina hi Copa America a champion pui a, nomawi lian tham a lakpui hmasak ber a ni. Mak ang reng tak erawh Pele leh Maradona te khan Copa America nomawi an chawi miah lo.

Pele
Goal khungtu ropui Pele hian World Cup nomawi vawi thum a chawi a, Copa America erawh a ngai pawimawh tawk loin niin a lang. Pele hian Copa America vawi khat chiah a hmachhawn a, kum 1959 khan Garrincha bakah World Cup nomawi chawi hlim player-te nen inelna hmachhawn mah se anmahni ang bawka ṭha Argentina lakah an tlawm.

Brazil hian Copa America hi kum naupang zawk chher hriam nan an hmang tam a, chutihrualin Pele hian Argentina leh Uruguay te hmachhawn aiin sum tamna zawk Santos tana khelh a thlang zawkah a ngaih theih bawk.

Maradona
Argentina captain zinga FIFA World Cup nomawi chawi hnuhnung ber chu Diego Maradona a ni a, amaherawhchu player ropui Maradona hian Copa America nomawi a chawi thei lo. Maradona chawi teuh ber ṭum chu kum 1987 kha a ni a, Claudio Caniggia nen inkawpin goal hmaah hlauhawm viau mah se Uruguay hneh loin semifinal an tla. Kum 1993 khan Argentina-in Copa America an champion a, nungchang ṭha loh avangin Maradona hi a tel lo.

Player langsar dang
Khawvel player manto ber Neymar-a'n Copa America hi a la chawi lo a, kum 29 mi Brazilian forward tan hun ṭha a la awm turah a ngaih theih. Amaherawhchu Zico (Brazil), Mario Kempes (Argentina), Socrates (Brazil), Alvaro Recoba (Uruguay) leh Daniel Passarella (Argentina) ten South America rama inelna sang berah hian an champion lo.

Colombia tan Diaz
Copa America 2021-ah goal li khung pahnih an awm a, Argentina forward Lionel Messi chu khawvelin a hriat a ni a, pakhat zawk Luis Diaz chu hming la chher tur chauh a la ni. Kum 24 mi Diaz hian pathumna inchuhnaah goal hnih a khung a, Colombia-in Peru 3-2 in an hneh a, chakna goal hi injury time-ah a khung.

Colombian winger hi FC Porto tan a khel mek a, kum 2019 khan Colombian club Atletico Junior aṭangin Portuguese club hi euro maktaduai 7-in a zawm. Season liam ta khan Diaz hian league match 21 khelin goal li a khung a ni.