Iranian Hero Sakhming dai lo tur Ali Daei

Asian footballer, ni lo, international football-ah tih zawk tur a ni - ni e, chutianga player hming ropui an lam apiang chuan Ali Daei hming lam rik a ni ṭhin a, Iranian striker chanchin hi thai bo theih a ni lo. 

Daei hian a vanglai khan Iran tan inelna hrang hrangah match 149 khel hmanin goal 109 ngawt a khung a, khawvelah mahni ram tana goal khung hnem lamah a tluk phak an la awm lo - Cristiano Ronaldo meuh pawhin a la chung en rih. 

Ni e, international football-ah chuan goal a khung hnem ber miau avangin Daei hi a chung berah dah a ni a, an ram jersey an hak apianga ṭha lehzual ṭhin nia an sawi Gheorghe Hagi, Hristo Stoichkov leh Diego Maradona-te huangah dah ngam a ni. 

Mahse, he striker hian Asian football a chawisan dan leh midangte tana chona a chhawpchhuah dan aṭanga thlirin ngaihsan a hlawh tawk lo niin mi tam takin an ngai a, a phu ang tawka fak a hlawh loa an ngai hi a awm lo hran lo. 

March 21, 1969 khan Iranian footballer piang tawh zinga ropui ber ang hiala chhal pakhat chu Ardabil, Iran-ah a piang a, a hmingah Ali Daei an sa. 

Inkhelh tui tak ni mah se lehkha zir chu a tan chuan kawng inhawng zawkah ngaih a ni a, Sharif University of Technology aṭangin Daei hi Materials Engineering-ah a graduate. Mahse, a tuina ber football a kalsan hleihthei lo. 

University a luhna hi Tehran khawpuia innghat a ni a, Daei hian hei hi remchangah lain Tejarat Bank FC-ah beiseina sang tak nen trial a va hmachhawn. Vanneihthlak takin legendary Iranian goalkeeper Nasser Hejazi chuan a lo hmu fuh a, Tejarat-ah hian bul a ṭan. 

Hejazi chuan, "A rilru huaisenna leh finna kha ka duh em em a, khaw dang ka hawi thei lo a ni," tiin Daei-a thlan chhan a sawi a, thlutlukna a siam tawh zinga fuh ber pawl a siam. 

Daei hian Tejarat-a a khelh hma hian Esteghlal Ardabil leh Taxirani F.C tan a lo khel tawh a, Tejarat-ah hian hlawhtlinna chhar zuiin kum li chhungin match 75-a khelhsak a, inelna hrang hrangah goal 49 a khung. 

Tejarat-a a khelh ṭhat avangin Daei hi Iran coach Ali Parvin pawhin a lo hmu vat a, mahse hei hi Tejarat tan chanchin lawmawm lo a ni. Parvin hian Iran bakah an ram club Persepolis a enkawl tel a, Daei chu ram tana inlan zel a duh a nih chuan Persepolis zawm turin thurawn a pe. 

Daei chuan, "Pa pakhatin (Parvin) min rawn bia a, Iran tana khelh ka duh chuan Persepolis zawm turin min rawn. Kan ram team-a a tam thei ang ber khelh ka duh avangin thutlukna siam ngai tur chu ka hrethiam nghal a ni," a ti. 

Persepolis-ah pawh Daei a mikhual lo hle - season hnih a khelh chhungin match 44 a khelhsak hman a, inelna hrang hrangah goal 26 a khung. Persepolis-a zawm hma hian ram tan kum khat chhung lekin match 16 a khel hman a, goal sarih a khung. 

Asia khawmualpuiah chuan Daei hming hriat a ni tawh a, ram tam takin Daei telna hmachhawn an chak lo. Sum tamna Qatari club ṭha Al-Sadd an lo lang vat a, Daei hian khaw dang hawi loin Qatar lamah a puanthuah a tel. 

Al-Sadd tan inelna hrang hrangah match 18 khelin goal 10 a khung a, hriat a hlawhna ber erawh an ram jersey a hakna chu a ni. Kum 1996-ah hian an ram team tan inelna hrang hrangah match 18 khelin goal 22 ngawt a khung!

Kum 1996-ah hian Iran hian Asian Cup an khel a, goal riat khungtu Ali Daei hi top scorer a ni chiang hle. Iran hian quarterfinal-ah 6-2 ngawtin South Korea an sawp a, Daei hian goal li a khung - vawiin thlengin Asian football-a chanchin ngaihnawm a la tling ta reng. 

Mahse, Daei tan kawng a awlsam vek bik lo. Semifinal-a Saudi Arabia nen an inhnehtawk hnuah penalty hmangin a chak zawk zawn a ni a, Daei hian Mohammad Khakpour nen an pet goal lo a, 4-3 in an tlawm. 

Daei-a'n a vanglai a hman lai hian Asian footballer tam zawkin Eruopean football khelh châk mah se an zuam lo ṭhin a, Iranian striker tan erawh chona phurawm a ni. 

Bundesliga kai thar Arminia Bielefeld chu Iran tana a khelhpui Karim Bagheri nen huaisen taka thutlukna siamin an zawm a, season khat bak a khel hman lo. 

Match 26 khela goal sarih a khung hnuah sum tam zawk nen Bayern Munich an lo lang a, ropui lehzual beiseia a puanthuah telin German club ṭha a zawm - season khat chiah khelin match 32 a inlan a, goal sarih a khung. 

Mahse, Bayern tan hian Bundesliga leh German League Cup-ah a champion a, Hertha Berlin lamah a kal - Berlin tan season thum a khelh hnuah a Germany zinkawng thawnthu chu tihtawp a ni a, UAE lamah a pem. 

Daei hi Asia lama a kir leh hnuah UAE club Al Shabab, Iranian club Persepolis, Saba Battery leh Saipa tan a khel leh a, kum 2007 khan inkhelh a chawlhsan. 

Iranian striker hian March 2006 khan Costa Rica lakah ram tana a goal 109-na a khung a, ram tana goal khung tam lamah tu mahin heti zat goal hi an la um phak thei lo. 

Kum 2006 World Cup Germany-in a thlen ṭum khan Iran squad-ah kum 36 mi Daei hi telh a ni a, mi tam takin an sawisel nasa hle. Mahse, Daei lo lawm hmasatu erawh Bayern legend Franz Beckenbauer a ni. 

Beckenbauer chuan, "Kum 100 chhunga Bayern player ṭha ber pawl a ni," tiin Daei hi a lo fak a, "Kan hnena a khel thei kha kan lawm takzet a ni," a ti - mahse, Daei-a telna Iran hi group stage-ah an tla a, Daei pawhin international football a mangṭha zui.