Aizawl FC an vanduai nawn

Nimin tlai I League inkhelah Aizawl FC leh Mohun Bagan te 1-1 in an inhnehtawk a, Mualpuia inkhelah hian goal, penalty, red card leh referee chunga lungawi lohna lantirna thlengin a awm vek.

Mizo club hian match 10 an khelh aṭangin point 15 an hlawh chhuak a, anni aia match khata khel tlem Minerva Punjab chu point sarih zeta an phak loh avangin champion nawn a harsa tawh dawn.

Champion lai Aizawl FC hian AFC Champions League playoff an khel dawn a, vawiin hian Iran club Zob Ahan Esfahan FC hmachhawn turin Mizoram an chhuahsan ang.

Tlarhnung thar
Aizawl FC-in Nigerian defender Kareem Omolaja inhliam vangin an chhawr thei lo a, Lalhriatrenga (Achia) chuan inkhel bul a ṭan. Achia hi right back a khel ṭhin a ni a, tun season MPL-ah centre back-ah hman ṭhin ni mah se left back-ah chhawr a ni.

Defence laiah Masih Saighani kawppui turin C. Lalrosanga a ding a, right back-ah R. Laldinliana a awm. Mohun Bagan-in an foreigner neih pali bul an ṭantir vek a, Mizo tlangval Ricky Lallawmawma a lut bawk.

Beisei pha lo
Ṭan aṭanga second 30 lekah AFC forward Yugo Kobayashi chuan yellow card a hmu a, thil thleng lian a awm zui lo. Mizo club tan winger tlan chak Leonce Dodoz club chu player hlauhawm ber ni mah se Mariners keeper Shilton Paul-a'n hna a harsa a nei lo.

Aizawl FC tlarhnung pawh fiahin an awm bik lo a, Kolkata Derby-a goal hnih khung hlim Aser Pierrick Dipanda erawh darkar chanve hnu lekah inhliam vangin lakchhuah a ni.

Japanese forward Yugo-a'n referee thutluknaa lawm loh vangin ball a pet lui a, yellow card vawi hnihna hmuh theihna ni mah se a chungah referee Senthel Nathan-a'n zahngaihna a lantir.

A hmuhnawm ta
Second half-ah Dodoz bawk a che ṭha a, David Lalrinmuana freekick chu Aizawl FC-in goal nawr nan an hmang. Mizo club goal nawr erawh bench aṭanga K. Lalṭhathanga (Puitea) leh S. Malsawmtluanga te luh hnuah a na ṭan a, Bagan tan AFC defender hlui Eze Kingsley chu a khel ṭha hle.

Minute 69-naah Romanian midfieder Andrei Ionescu ball pet chuan Bagan right back Arijit Bagui kut per mah se referee-in a en liam. Minute 73-naah Dodoz-a thawhrah sengin Puitea'n goal-ah a pet a, keeper Shilton-a'n dang mah se a per chu goal-ah a lut tho.

AFC tan ban phakah point thum a awm hman a, amaherawhchu minute nga hnu lekah Akram Moghrabi chuan penalty a hlawh chhuak. Aizawl FC keeper Avilash Paul a che tlai hret a, Lebanese midfielder Akram-a'n a ball a pet hnuah a khawih fuh hram a, hemi aṭanga penalty hmuh chu substitute Manandeep Singh-a'n chiang takin a khung.

Aizawl FC-in chak tumin an nawr a, Andrei-a'n goal ban hrula a pet out bakah Dodoz-a'n chance ṭha a hlah a, Mizo club an vanduai a. Champion kalkawng harsatna belhchhah turin minute 89-naah Alfred Kemah Jaryan chu Bagan midfielder Akram-a tlawh vanga hnawhchhuah a ni a, 1-1 in inkhel a tawp.

AFC coach a thinrim
Aizawl FC coach Paulo Meneses chuan, "Referee khan second 30 lekah yellow card a phawrh nghal a, football-a kum 24 chhung ka inhnamhnawih tawhah khatiang kha ka la hmu ngai lo. Penalty a pek laia min pek ve lo te leh a thutlukna tam tak kha keimah chauh ni loin mipuiin an hmu a, inkhel bana thil thleng khan a sawifiah vek a ni," tiin referee chunga a lungawi loh thu a sawi.

Inkhelh banah Aizawl FC ṭantuten bottle leh thil dang khelmual lam hawiin an vawm a, Mizo club hian dan pela supporter-te chet vangin season hmasa lamah pawisa an chawi tawh a, nimin thil thleng vang hian pawisa chawi nawn leh thei dinhmunah an ding.

Portuguese coach Meneses chuan sawi chhunzawmin, "Point thum hmuh kan phu a, point khat chauh kan hmuh avangin champion chu a harsa tawh dawn," tiin champion tura vanneihna an mamawh tawh thu a sawi.

Mohun Bagan coach Sankarlal Chakraborty chuan, "Chak kan duh thu ka sawi tawha, chuvangin kan result-ah ka lawm lo. Chutihrualin a vannei zawk kan ni a, tun hi Aizawla vawi thum kan khelh tawh a kan vawi khat point hlawhchhuahna a nih avangin lawmna tur erawh a awm tho," tiin a sawi.