Edmund tlawmtu Cilic

Marin Cilic chuan a vawi khat nan Australian Open final a lut ta. Nimin tlai semifinal inkhelah Cilic hian Britain tlangval Kyle Edmund-a beiseina chu darkar hnih leh minute 18 chhungin 6-2, 7-6 (7-4), 6-2 in a tihtawp sak.

Rod Laver Arena-ah 2014 US Open champion Cilic-a'n a tir aṭanga a tawp thlengin inkhel a thunun thei a. Set khatna an khelh zawh hnuah Edmund-a'n medical timeout lak a ngai a, set hnihnaah bei tawk mah se Cilic chu a chungnung zawkah a ṭang a, Croatian star hian harsatna nei loin set thumna a la leh bawk.

World number 6 Cilic hian Edmund lakah aces vawi 11 a siam thei a, nidang ang bawkin tihsual a ngah lo - double faults vawi khat chiah a nei. A ball vuak a naiin service a hum ṭha a, ama service hmasa bikah phei chuan point nga chiah a hloh. Rafael Nadal a hneh ṭum ang bawkin na takin a khingpui a nawr tawm thei a ni.

Kum 29 mi Cilic hian a vawi thum nan Grand Slam final a thleng a, quarterfinal-ah world number 1 Rafael Nadal a hneh tawh bawk avangin inrintawkna a nei sang khawp ang, a champion thei a nih chuan a tan nomawi lian pahnihna tur a ni ang.

Croatian tlangval Cilic chuan, "Edmund kha nidang angin a che rang tawk lo tih ka hmu a, kha vang khan court sir thei ang berah ball ka pe kual nasa hle, ka hlawhtlinna chhan pawh a ni. Match kan khel hnem tawh a, boruak sangah chuan chiai loa awm theih hi a pawimawh ber a ni," a ti.

British number 2 Edmund-a'n hnehna chang ni sela chuan Andy Murray khumin an ram number 1 nih theihna hun ṭha a nei. Mahse, seeded 11-na Kevin Anderson leh seeded pathumna Grigor Dimitrov te a hneh ṭum angin a che ṭha tawk lo a, boruak sangah a tawnhriat neih tam loh a lang.

Vawiin tlai dar 2 hian Grand Slam vawi 19 champion tawh Roger Federer leh Hyeon Chung ten semifinal hnuhnung zawk an khel dawn a, a chak zawnin Pathianni tlai hian final-ah Cilic an hmachawn zui ang.

Kum 36 mi Federer tan Australian Open semifinal vawi 14-na tur a ni a, a champion nomawi kawl lai humhim turin tawnhriat a ngah tawk tawh. Chung-a tan erawh a major tournament semifinal hmasa ber a ni thung, chutih rualin world number 1 hlui Novak Djokovic leh Alexander Zverev te vaw thlatu a ni.