Chelsea ngamtu Arsenal an tlang

Arsenal chuan an mikhual Chelsea lakah 2-1 a hnehna changin Carabao Cup final an lut. Arsene Wenger chuan Blues laka hnehna an chan hnuah a nauten rilru dang nei loa an theihna tak an phochhuah thu a sawi–February 25 hian Manchester City nen Wembley Stadium-ah nomawi an inchuh ang.

Nilaini zan Emirates Stadium-a semifinal second leg inkhelah, Blues tan Eden Hazard-a'n minute sarihna lekah goal hmahruai khung mah se Antonio Rudiger chuan anmahni lama a ti lut a, second half-ah Gunners midfielder Granit Xhaka-a'n chakna goal a khung; kum 1993 hnua a vawi khat nan League Cup nomawi chawi leh thei dinhmunah an inhlangkai.

Wenger a lawm
Alexis Sanchez-a transfer boruak a lian a, Arsenal hian khelmual chhungah result ṭha an nei hleithei lo bawk. Chile international hmalam hun a chian hnuah match hnih an khel a, hnehna an chang ve ve. Wenger chuan, "January thla a ni a, boruak dangin min chim buai hle. Tunah chuan kan thil tumah kan chiang tlang leh tawh a, hmalam hun kan thlir tlang ang," tiin a sawi.

Tun hnaiah Emirates Stadium chhungah ngei pawh Arsenal player ten rin an hlawh zo meuh lo a, beisei angin bul an ṭan leh lo bawk. Blues midfielder Tiemoue Bakayoko leh Pedro te thawhrah sengin Hazard-a'n chiang zetin Gunners keeper David Ospina a paltlang nghal.

Mahse, Antonio Conte naute lawm chhung a rei lo. Goal a luh aṭanga minute nga lek a liam hnuah defender Nacho Monreal-a ball tauh chuan Marcos Alonso leh Rudiger te a fuh hnuah a lut a, 1-1 chiah a ni. Striker Alexandre Lacazette sutkuak zarzotu Xhaka-a'n chakna goal a khung a, Blues-in an goal hnihna an chhuah kawngah Rudiger-a'n a hna a thawk ṭha tawk lo.

Arsene Wenger-a nauten hma takah goal chhuah mah se an insiamṭha thei. Chelsea lamin na takin nawr mah se tun season chhunga an defensive game ṭhat ber ṭum ni hiala ngaih an tawng–Blues lamin target-ah vawi khat bak an pet chhunzawm tawh lo; Arsenal hian 2011 hnua a vawi khat nan final an lut.

Tlarhma buaina
Premier League champion Chelsea-in hnungzâng na vangin striker rinrawl Alvaro Morata an chhawr thei lo a, tlarhmaah Pedro, Hazard leh Willian te an inkawp. Barcelona forward hlui Pedro-a'n Belgium international Hazard tan goal khatna a siamsak a, an inremfuh viau dawn niin a lang.

Amaherawhchu, Conte nauten goal an chhuah zui bakah hliam vangin Willian lakchhuah a ni a, Everton aṭanga pound maktaduai 15-a an lakluh Ross Barkley chu a vawi khat nan minute 30-naah bench aṭanga luhtir a ni.

England midfielder hi a tirah khelmual sir lamah khelhtir ni mah se dinglamah leh a laiah sawn a ni a, malpui hliam dam hlim Barkley hian danglamna a siam phak lo a, ram tana hmun a inchuhpui tur pakhat Jack Wilshere a tluk loh bakah Laurent Koscielny laka a foul vanga hrem a ni lo chu a vannei hlauh.

Real Madrid hmatawng hlui Morata awm loh niah Chelsea tlarhma an hlauhawm tawk lo a, Andy Carroll, Peter Crouch leh Edin Dzeko te nen sawi zawm mek an ni. Chelsea hian FA Cup khelh tur an la nei a, league lamah nomawi humhim beiseina chhete an la nei bawk–season tawpa nomawi chawi an duh a nih chuan tlarhma siamṭhat an ngai hle.

Eng nge an sawi?
Arsenal manager Arsene Wenger chuan, "Inkheltir lamah khan Chelsea kha kan dah zalen deuh a, kan tuar bawk. Kan khel ṭha lo tih kan hriat hnuah kan insiamṭha thei a, chawhnu lamah chuan team ṭha zawk kan ni," tiin a sawi. Wenger hian tun hma lama an tih tawh ṭhin angin Wembley-ah fans lawmna siam leh ngei an beisei thu a sawi bawk.

Chelsea coach Antonio Conte chuan, "Final thlen tumin kan khel a, ka naute khan an theihtawp an chhuah a ni. Goal hnih kan chhuah a, kan lama a luh dan kha vanduai vang a ni. Kan player ṭha berte zinga mi hliam vangin kan chhawr thei lo a, a awlsam lo ve bawk," tiin a sawi.