Santiago Bernabeu-ah Real an pet chhuak
Real Madrid-in an season duhawm lo hman mek an thlah fel hleithei lo - Nilaini zan khan Copa del Rey quarterfinal aṭangin petchhuahin an awm a, Real barakhaihtu team Leganes hi La Liga table-ah 13-na an ni!
Quarterfinal first leg-a team pahnih inhmachhawn ṭumin Real hi 1-0 in an chak a, second leg hi Santiago Bernabeu-a khelh tur a nih avangin chak tur chiangah ngaih an ni. Mahse, Real khelmualah beisei loh result a thleng a, Leganes-in 2-1 in hnehna an chang - inkhel hmasa nena belhkhawmin 2-2 ni mah se khualmuala goal khung hnem zawk Leganes an tlang.
Zidane a chesual?
Real Madrid boss Zinedine Zidane-a'n Leganes a zuam a, an muala an inkhelah a player pawimawh Cristiano Ronaldo leh Gareth Bale chu squad-ah pawh a dah lo a, Luka Modric chu bench-ah a dah bawk - French manager hian a player pawimawh hmang lo tawp erawh a ni lo a, captain Sergio Ramos, midfielder Isco leh striker Karim Benzema ten inkhel bul an ṭan.
Beisei loh taka goal khung hmasa zawk erawh Leganes an ni a, minute 31-naah Javier Eraso chuan goal hmahruai a khung. Real tan Benzema-a'n chawlhlawk hman aṭanga minute hnihna lekah an si phurh sut mah se Leganes-in huaisen takin an bei chhunzawm a, Brazilian midfielder Gabriel-a'n minute 55-naah chakna goal a khung - Real-in a chhanletna tur an nei tawh lo a, beisei loh team an chak.
Kum duhawm lo
Real-in tun season-ah champion beiseina pakhat chiah an nei tawhah ngaih a ni a, chu chu Champions League a ni - last 16-ah team ṭha Paris St-Germain an hmachhawn dawn a, hei pawh hi beiseina tih san har tak a ni. La Liga-ah match la tam mah se hmahruaitu Barcelona chu point 19 ngawtin an phak tawh lo a, Catalan club umphak hi Real tan beisei chia ngaih a ni tawh lo.
Leganes tan erawh Santiago Bernabeu-a inkhel hi club chanchina hriatreng tawh tur a ni ang - kum li liam taa third division-a la inlan club hian Nilaini zan inkhelh hma hian Real hi match ngaah an lo hmachhawn ve tawh a, an tlawm fai vek! Tunah erawh thawnthu ziah danglamin a awm a, Copa del Rey semifinal khel turin Santiago Bernabeu-ah ngei hnehna hlado an chham.
Fiahna tur PSG
Champions League-ah season hnih chhung a zawnin Real champion pui mah se Zidane-a'n tun season-ah beisei a phak lo a, club lian enkawl a nih miau avangin a chungah pressure a na tawh ang tih hai rual a ni lo. French manager pawhin hei hi pha duh loin, "PSG nena kan inkhel tur hian ka hmalam hun a hril dawn tih thuah phat tur a awm lo a, engkim a lang chiang nghal vek a ni," a ti.
Player a nih lai pawha Real legend Zidane chuan, "Coach ka ni a, kan khelhchhiat chhana mawhphurtu chu keimah ka ni. Tuna ka tih tur chu kan thawh leh dan tur zawn a ni a, huaisen takin ka bei zel ang. Nasa takin hna ka thawh chhunzawm zel ang a, he team hi a ṭhat zawk theihna turin ka bei ang," a ti a, player pawimawh ṭhenkhat a chawlhtir chungchangah, "Ka inchhir lo, ka player ṭhenkhat chuan chawlh hahdam an mamawh a ni," tiin a sawi bawk.