AS Roma an chelh

Season hmasa Serie A pahnihna AS Roma chu Sampdoria lakah an chak zo lo. Roma hian hun tawp dawna Edin Dzeko goal hmangin khualmualah point khat an hlawh chhuak hram.

Nilaini zan Serie A in­khelah Sampdoria lamin Fabio Quagliarella-a penalty chhuih luh hmangin hma an hruai a, hun pekbelhah Chelsea nena sawi zawm lai Dzeko chuan a sut hram.

Manchester City striker hlui Dzeko-a'n Roma tan league match 89 a khelh aṭangin goal 47 a khung ta a, Premier League champion Blues nen sawi zawm mek an ni. Italian club lam chuan an striker duhlai hi chhuahtir an phal rih lo.

Roma sporting director Monchi chuan, "Dzeko hi kan hnena awm lai a ni a, hlim takin a inkhel mek. Tun thleng chuan club dangin an rawn ngaihvenna leh min dawrna hi kan pawm lo," tiin a sawi.

Season kal laiah Roma hian point 41 hmuin pangana an ni mek a, hmahruaitu Napoli an thlauhna chu point 13 zet a ni tawh thung.

Inkhel dangah Lazio chuan Brazilian defender Samir-a own goal bakah Nani leh forward Felipe Anderson te goal hmangin Udinese chu si thum faiin an sawp a, table-ah pathumna dinhmun an luah.

Manchester United win­ger hlui Nani-a'n nikum August thla khan La Liga club chhuahsanin Lazio a pan a, hliam vangin a inlan mumal lo - Udinese nena an inkhel hi league match bika inkhel bul a ṭan hmasak ber a ni.