Martin O'Neill pahnih an rinawm!

Republic of Ireland manager Martin O'Neill chuan a hna ngai thawh chhunzawm zel turin kum 2020 thleng atan contract thar a ziak a, kum 65 mi manager-in contract thar a ziah hnu lawkah Northern Ireland boss Michael O'Neill chuan an ram team chu kum 2024 thleng a cham chilh tur thu a puang ve leh ta bawk.

Kum 65 mi Martin O'Neill hi Stoke City-in an ban tak Mark Hughes hmunruak luah turin dawr mah se he sawmna hi a hnar a, Eurp 2020 thlenga Ireland kaihhruai hi a thlang ta zawk a ni. Kum 2013-a Giovanni Trapattoni hmunruak luaha Ireland pantu Martin O'Neill rual hian a coaching staff te pawhin contract thar an ziak ve nghal bawk a, an zingah hian assistant Roy Keane pawh a tel.

Sunderland boss hlui hian Euro 2016-ah khan Ireland hi a inlankaipui a, last 16 hial thleng mah se France an ngam lo. World Cup 2018-ah playoff khel mah se Denmark chu 5-1 in an ngam lo a, kuminah Russia-ah an hmel kan hmu lo ang.

Hetihlai hian Scotland sawmna hnartu Northern Ireland boss Michael O'Neill chuan kum li dang cham a tum chhan sawiin, "Ka player-te ka rawn vek tawh a, Northern Ireland-in contract duhawm tak min zawrh bawk nen ka tan hnar phal a ni lo," tiin a sawi.