Pune City-in Jamshedpur FC an ngam

Indian Super League khelh mekah Pune City chuan Nilaini zan khan Jamshedpur FC chu 2-1 in an hneh a, champion beiseina an la chhi nung ve zel. Mikhual team JFC lamin goal an khung hmasa zawk a, minute 29-na lekah Wellington Priori chuan goal hmahruai a khung.

Jamshedpur-in an khelh ṭhat an chhawm nung zel dawn emaw an in ti a, goal dang lut loa chawlhlawk hman a nih bawk avangin mahni muala khel Stallions (Pune City sawina) an tlawm mai dawn niin a lang hman.

Mahse, minute 62-na aṭang­in Pune an inlar ṭan a, Gurtej Singh chuan Mar­celinho hnen aṭanga a ball hmuh ṭha tak chu an si phurh sutna goal ni turin a tauh lut - a la tawp mai lo. Pune an phur tulh tulh a, an si phurh an sut aṭanga minute li a liam hman tihah an hmahruaina goal an khung chhunzawn lehnghal.

Brazilian forward Mar­celinho bawk a inlar a, a vawi hnih nan assist neiin Lazio striker hlui Emiliano Alfaro chuan a hun ṭha neihah team chakna goal a khung - tho leh turin JFC an zuai tawh a, Pune club-in hnehna an chang.

Pune City tan Lalchhuan­mawia Fanai chuan inkhel bul ṭan lo mah se second half-ah tlan luhtir a ni a, Isaac Vanmalsawma'n inkhel bul a ṭan bawk. Jamshedpur tan Jerry Mawihmingthanga hmel hmuh tur a awm a, Chanmari tlangval hian hun pumin a team tan a khel.

Zanin dar 8:00-ah ISL inkhel pakhat a awm dawn a, Thawhlehni zana AFC Cup preliminary round-a goal khung loa Bhutan club Transport United inhneh­tawkpuitu Bengaluru leh Chelsea boss hlui Avram Grant hnuaia harhtharna chang mek NorthEast United nen an inkhel ang.