Beckham-a tan MLS team a hnai

England captain David Beckham chuan Major League Soccer team neih tuma hma a lak mekna kawngah a team thar chu karleh hian Miami khawpuiah a tlangzarh dawn niin khawthlang media te chuan an tarlang.

Beckham hian rei tak chhung chu MLS team neih ngei tum hian hma a lo la tawh a, mah se Florida chhim lama a stadium sak tum chu a sak tumna hmuna chengte nen an inrem theih loh avangin kum li ngawt chu MLS club neih a tumna hi a khawtlai phah.

MLS lam hotute chuan official takin engmah thuchhuah an la siam lo a, mah se Miami club chungchangah hma an lak mek thu leh thuchiang a awm thuai tur thu an sawi. Chanchinbu lar The Miami Herald chuan Thawhṭanniah chuan Miami team hi tlangzarh a nih tawh tur thu an ziak a, Associated Press pawhin he thu bawk hi an chhuah.

Miami-Dade County mayor Carlos Gimenez pawhin an khaw team hotuten Thawhṭanni atana lo inring tura an biak ngei thu a sawi a, eng ber nge club-in an puan dawn erawh a hriat bik loh thu a sawi.