October-ah NBA zawh an tum

Basketball inelna sang leh ngaihhlut ber NBA chu kumin October hian khelh zawh theih an beisei, hripui vang hian tun dinhmunah chuan inelna hi an nei thei rih lo - an khelh chhunzawm hun tur pawh chiang taka tarlan erawh a la ni lo.

March 11 aṭang khan NBA hi chawlh lailawk a ni a, media lian leh rintlak zinga mi ESPN-in a tarlan dan chuan NBA Board of Governors chuan NBA Finals Game 7 chu a tlai berah October 12 aia tlai loah khelh theih an duh.

NBA leh NBA Players Association chuan league khelh chhunzawm hun tur an la tichiang dawn a, tuna an beisei dan chuan July 31 aṭangin khelh chhunzawm theih an inring.

United States hi khawvel puma ram malah hri kai tamna ber an ni, infiamna an kalpui a nih pawhin an fimkhur a ngai dawn hle. NBA hi an khel chhunzawm a nih pawhin a hmuna entu an awm dawn lo.

Khawpui hmun khatah team zawng zawng chu ni 14 chhung khung hran an ni ang a, chumi hnuah team tinin training an nei leh phawt ang. Inkhelh hmain hri an kai em tih enfiah a ni ṭhin dawn a, a fihlim chin chauh court-ah an lut thei ang.

Court hrang hranga khel loin ESPN Wide World of Sports Complex, Orlando Florida-ah match zawng zawng khelh an tum a, regular season bakah playoff khelh tur a la awm - conference champion zawn hnuah NBA Finals an la khel leh ang.

March thlatir khan Utah Jazz player Rudy Gobert chu coronavirus a kai tih hriat chhuah a ni a, kar hnih a liam hnuah hripui lakah a fihlim tih hriat ni mah se khelh zui theih a la ni lo. Tunah chuan an duhthusam a thlen theih hun nghakin an thlir mek.