Chung-a chunga leng Federer

Champion lai Roger Federer chuan Chung Hyeon hnehin Australian Open final a lut a, hnehna a chan hnuah a khingpui Chung-a hliam vangin a inkhel zui thei lo chu pawi a tih thu a sawi. Pathianni chawhnu dar 2:00 hian Rod Laver Arena-ah world number 6 Marin Cilic nen final an khel zui leh dawn.

Nimin tlai Rod Laver Arena-a inkhelah Australian Open vawi nga champion tawh Federer hian darkar khat leh minute hnih chhung lekin Chung lakah 6-1, 5-2 in hnehna a chang. Set hnihna an khelh laiin Chung hi hliam vangin a inkhel zui thei lo, a vawi khat nana Grand Slam final luh a tumna chu a tawp.

A vawi 20 nana Grand Slam nomawi chawi beiseitu Federer chuan final thlir nghalin, "Marin Cilic hian Rafa leh Edmund lakah zahngaihna a lantir lo, thahrui a ngahin kawng engkimah a chungnung hle tih kan hmu, ani nena kan inkhel tur hi a awlsam lo ang" tiin a sawi.

A awlsam
"Chung hian Novak Djoko­vic lakah match ropui a khel a, ani hneh tur chuan tun tournament bika ka match ṭha ber khelh a ngai hial ang" tiin Federer-a'n a sawi lawk. Match ṭan a nih aṭangin Swiss star Federer a fimkhur a, bul pawh a ṭan fuh hle.

Melbourne Park-ah Chung-a'n a service hmasa, Federer-a'n a chhuhsak nghal. Darkar chanve chhung lekin set hmasa ber a la nghal. Set hnihnaah pawh Federer bawk a chungnung zui leh, 4-1 a nih laiin Chung-a'n a ke phah na vangin medical timeout a la a, game hnih khel zui leh mah se Korean tlangval hi a inkhel zui thei tawh lo.

Match hautak khel tura inbuatsaih Federer tan awlsam taka hnehna chan hi duhthusam a ni ngei ang, hnehna a chan hnuah Federer chuan, "Set hnih­na kan khelh ṭan tirh khan harsatna a nei tih ka hria a, huaisen taka min bei thei kha ka lawm. Final ka luh avangin ka lawm a, chutih rualin khingpuite hliam vang ni loa hnehna chang chu ni ila duhthusam zawk a ni," a ti.

Beiseina
South Korea khawpui pakhat Suwon-a piang Chung Hyeon hian kum ruk mi a nih lai aṭangin tennis a khel ṭan a, kum 2014 khan IMG tennis training academy, Florida-ah lutin tunah hian South African coach Neville Godwin kaihhruaina hnuaiah Seoul-ah a inzir chhunzawm mek.

Nikum khan Chung hian French Open third round a lut a, tun ṭum hi Grand Slam inelna huang bikah chuan a thlen san ber ṭum a ni. Player ṭha leh huaisen tak a ni tih chu a chiang, mahse hun pawimawh leh boruak sangah a tawnhriat neih tam loh a lang.

World number 2 Federer chuan, "Chung hi nakinah chuan a thiam 10 zingah a la tel ang tih ka chiang, a chung lam zel chu ka sawi lawk thei lo. A lakah pressure siam lawk ka duh lo a, chutihrualin player ropui tak a la ni ang tih chu ka chiang," tiin a sawi.

Cilic a inpeih
US Open champion hlui Cilic chuan nomawi inchuhna tur inkhel thlirin, "Federer hi hneh theih loh a ni bik lo. Ka fit ṭha a, ka taksa leh rilru hi final khel turin a inpeih a ni," tiin a sawi. Wimbledon final an khelh ṭum hian Cilic hi a ke phah hliam vangin a buai a, tun ṭumah erawh dam ver vawrin a hmachhawn ang.

World number 6 Cilic chuan sawi zawmin, "Engtiklai pawhin Federer hi chuan khingpuite nawr a tum ṭhin, tun ṭumah pawh a ni leh chiang dawn. Ka inven uluk a ngai dawn a, chutihrualin match hmasa lama ka chet ang bawkin ka duh danin ka khel ve thei ang," a ti.

Season hmasa khan Federer leh Cilic te hi vawi hnih an intawng, Wimbledon final-ah leh WTA Finals group match-ah te Federer hian hnehna a chang ve ve.