Chennaiyin tan Jeje-a goal
Indian Super League-ah Mizo hming a mawi leh ta - Jeje Lalpekhlua chuan a club khelhna Chennaiyin FC tan chakna goal a khung a, Jerry Lalrinzuala chu Emerging Player of the Match-ah thlan a ni bawk.
Ningani zan khan Chennaiyin chuan an mikhualna ramah coach ban hlim ATK an lenchilh a, Ashley Westwood-a enkawlna hnuaia khel team hi 2-1 in an hneh - Kolkata khawpuia Chennaiyin-in hnehna an channa hmasa ber a ni a, nomawi an beisei chhunzawm zel.
Minute 44-naah ATK lamin goal an khung hmasa zawk a, January transfer window-a an lakluh Martin Paterson chuan Kolkata club tana a match hmasa berah goal a khung nghal - Northern Ireland international hlui hian Stoke City, Burnley, Huddersfield Town leh Blackpool tan pawh a lo khel tawh a, enzui bik a sual lo ang.
Chennaiyin hian chawlhlawk hman a nih hnu, minute 52-naah Mailson Alves hmangin an si phurh an sut a, Jeje Lalpekhlua chuan minute 64-naah hmahruaina goal a khung ve leh bawk.
Jeje hian goal khung theihna remchang dang a neihah ATK keeper Debjit Majumder a paltlang thei lo a, Hnahthial tlangval hian ball siamsaktu Raphael Augusto tan hun ṭha siamsak zui ve mah se Brazilian midfielder hian goal a khung thei bik lo.
India international Jeje-a'n tun season ISL-ah match 11 khelin goal sarih a khung tawh a, Indian player zingah Sunil Chhetri nen goal khung hnem ber an ni dun mek - nizana NorthEast United leh Bengaluru inkhela Chhetri goal khung dan a zirin hei erawh a danglam leh thei.
ISL-a top scorer dinhmun luah mektu Ferran Corominas-a'n match 10 a khelh tawhah goal 10 a khung tawh a, Espanyol striker hlui hian Jeje leh Chhetri aiin goal thumin a khung hnem zawk.
Mimal Lawmman
Moment of the Match Martin Paterson, ATK
Winning Pass of the Match Anirudh Thapa, Chennaiyin FC
Fittest Player Gregory Nelson, Chennaiyin FC
Emerging Player Jerry Lalrinzuala, Chennaiyin FC
Hero of the Match Anirudh Thapa, Chennaiyin FC
Zanin Inkhel Tur
Kerala Blasters 8:00 PM Delhi Dynamos
January 28, Pathianni Zan
FC Goa 5:30 PM Mumbai City
ATK 8:00 PM Jamshedpur FC