Jordan Henderson hoin Liverpool

FA Cup fourth round-ah zanin dar 1:15 hian Liver­pool-in Premier League club tho West Brom an mikhual dawn a, zanin inkhelah hian captain Jordan Henderson chu rawn let tura beisei a ni.

English midfielder Henderson hian December 22-a Arsenal nen 3-3 a an inhnehtawk ṭumin a malpuiah hliam a tuar a, hemi vang hian match ruk chhung a awl tawh. Tunah chuan Hendo hian training a zawm tawh a, Baggies nen chhawr theih tur zingah a awm ang.

Hetihlai hian Swansea an hneh loh ṭuma damloh vanga tel lo defender Dejan Lovren dinhmun a la hriat loh a, ngalrek hliam Alberto Moreno dam tawha ngaih ni mah se left back-ah Andrew Robertson chu inkhel bul ṭan tura rin a ni thung.

Liverpool hian Mersey­side Derby-a Everton an hneh hnuah league-a hma­hruaitu Manchester City an hneh a, amaherawhchu an phur vanglai tak hian table mawngphaha awm Swansea City lakah a tlawm. Reds chanchin sawi apianga club lian laka khel ṭha tih leh club te laka point hloh ṭhin tih chu an la hmang chhunzawm zel ang.

Baggies lakah pawh hian Jurgen Klopp-a hote hi an fimkhur a ṭul a, nikum December thlaa Anfield-a an inhmachhawn ṭumin goal awm loin an inhnehtawk. Tun ṭumah hian Reds hi chak zawk tura rin kai an ni nachungin FA Cup hi knockout a nih miau avangin eng result pawh thleng thei a ni.

Premier League club lian dang Manchester City leh Tottenham Hotspur ten Car­diff City leh Newport County te an hmachhawn dawn avangin an hmabak a har loah a ngaih theih a, Chelsea erawhin Newcastle an khelhpui dawn avangin fifth round thlen a awlsam lo ang.

Blues hian League Cup semifinal-ah Arsenal an hneh lo a, tun season-a Antonio Conte hote khelh dan hriatthiam a har hle. FA Cup fourth round thleng tur pawh hian Norwich chu replay an khelhpui hnuah penalty-ah an hneh hram a, Italian manager hian fixture tam laia replay pumpelh a duh chuan Magpies an hmachhawn hunah player ṭha a lutir a ṭul ang.

Chelsea tana thu lawm­awm erawh Stamford Bridge-ah an khel dawn a, tun hnaiah Eden Hazard a ṭha bawk. Belgian forward hian match hnuhnung pahnihah goal thum a khung. Conte hote hian FA Cup bakah Champions League-ah nomawi chawi beiseina an la nei a, Europe inelna sang berah Barcelona an hmachhawn dawn avangin nomawi chawi an duh a nih chuan Magpies nena an inkhel tur hi an lak thu tak a ṭul a ni.