Nomawi leh sang ber nih inchuh Halep vs Wozniacki

Vawiin chawhnu dar 2:00 hian Australia rama tennis court hmingthang leh an chhuanvawr Rod Laver Arena-ah Australian Open 2018 hmeichhe singles final khelh a ni dawn a, Simona Halep leh Caroline Wozniacki te an intawng dawn.

World number 1 Halep leh a hnuai chiaha awm Wozniacki te hi major title la chawi lo an ni, a chak zawk tan tennis khawvel a danglam hlawk dawn; champion zawk chu kar leha ranking chhuak tharah number 1 a ni bawk ang - player pahnihte tana inkhel pawimawh bik a nihna hi a sang vet vet hle.

Come On
Denmark nula Wozniacki hian US Open final vawi hnih a khel tawh a, khawtual nula Serena Williams a ngam loh avangin nomawi a la chawi lo. Kum 20 mi chauh a nih laiin Australian Open-ah hian player beiseiawm ber pakhat a ni tawh bawk.

Melbourne Park-ah Li Na nen an intawng a, 5-4 a nih hnuah a service zui bawk; 30-0 in hma a hruai a, mahse a ṭang tlang zo lo. China nula Li Na hian lehthalin nomawi a chawi zui bawk.

Grand Slam-ah champion lo mah se kum 2010-2011 chhung khan chawlhkar 67 chhung chu world number 1 a ni tawh, WTA titles 27 vaw chhuak tawhtu hian nomawi lian chawi theihna hun ṭha a neih leh hi bawhpelh leh a tum tawh lo.

Kum 27 mi Wozniacki chuan, "Match khat chiah khelh hmabak kan nei tawh a, keimah ka infuihna chu 'Kal zel rawh' tih hi a ni. Ka hun hmasa lama ka chak lohna kha rilruah a la awm, tihsual tawh hnuah chuan siamṭhat theih a ni tawh lo, tun ṭumah erawh hahdam takin khelh ka tum ang," tiin a sawi.

A vawi thum nan
World number 1 Simona Halep hian French Open final vawi hnih a khel tawh a, rinkai ni chungin a chak lo. Romanian nula tan a Grand Slam final vawi thumna a ni a, a ranking humhim tur leh daingai loh ram dai turin a inpeih.

Kum 26 mi Halep hian semifinal-ah 2016 champion Angelique Kerber a hneh. German nula Kerber lakah Halep hian match point vawi hnih a inchhanhim thei a, tun hma aiin a rilru a huaisen zawk tawh tih a hmuh theih.

Seeded pakhatna Halep chuan, "Ka beidawng duh lo a, a tawpah a hlim zawkah ka ṭang. Nidang ai zawng pawhin ka rilru leh taksa ka hmang nasa," tiin semifinal-a hnehna a chan hnuah a sawi - Halep hian fiahna hautak a paltlangah ngaih a ni.