Retheihna ngamtu Alexis Sanchez

Manchester United jersey number 7 ha tu Alexis Sanchez hian a naupan laiin boot leina tur pawh nei zo lo mah se tunah chuan a football thiamna hmanga a hlawhchhuah hmangin a duh ang a lei thei tawh a. Chilean star hian footballer-te duhthusam thleng tur hian a tumruhna hmangin retheihna leh harsa dang a paltlang tih hriat pui a ṭha hle.

Retheihna aṭangin
Chile hmar lama khaw pakhat Tocopilla-ah Sanchez hi December 19, 1988 khan an rawn piang a, an khua hi tuipui bula awm a nih avangin eizawn nana sangha man an tam a, lungalhthei khurah an inhlawh nasa bawk. Sanchez-a unaupa Humberto chuan, "Alexis hi footballer chu ni lo se helai hmuna cheng mipa dang ang hian lungalhthei khurah a inhlawh ang," a ti.

A naupan lai aṭangin a harhvang a, second rei lote chhungin thingkungah a lawn thei a, an inkhelha ball a boin a hmu hma thei em em bawk. Hei vang hian Sanchez hi 'Dilla' tihin an ko a, chu chu Spanish ṭawnga ‘ardilla’ tih lam tawi a ni a, 'thehlei' (squirrel) tihna a ni.

Sanchez hi a nu Martina-i'n a pai laiin a pain a chhuahsan a, Jose Delaigue (a patea) chu pa anga neiin kum 2011 khan cancer vangin a thi. Alexis hian unaupa Humberto bakah unau hmeichhe pahnih Marjorie leh Tamara a nei a, mipui 25,000 vel chauh awmna khua Tocopilla-ah a rethei zinga mi an ni a, sum dehchhuah an harsat hle. A nu Martina-i'n sangha zawrh hmangin nitin ei tur a thawk chhuak a, Alexis hian thlanmual bula lirthei an dah ṭhin chu inhlawh nan a ven sak ṭhin a, a sil fai sak ṭhin bawk.

Hetihlai pawh hian Alexis hian footballer hlawhtling nih a tum tawh a, "Pawisa thawhchhuah a harsa a, ka nu hnenah 'footballer ka la ni ang a, car leh chenna tur in nuam tak te ka la leisak che' tiin ka intiam a, ani erawh a nui liam mai ṭhin," tiin a naupan lai an harsat theih thu kum 2013 khan Spanish chanchinbu El Pais a hrilh a, tunah erawh engkim a danglam ta.

Sanchez hian football a khel hma a, kum 6 a nihin khawtual club Arauco a zawm tawh. Kum 15 a nihin a club khelhna Arauco ṭantu an khaw bawrhsap chuan reebok boot a lei sak a, hei hi Sanchez-a'n a ma puala boot a neih hmasak ber a ni a, hemi hma zawng hi chuan a nuin midang ta a hawhsak ṭhin. Alexis chuan, "Ka boot khan hling a nei a, phaitual hnima khelhna tura siam a ni nachungin ka lawm lutuk avangin kawnga inkhelhnaah te ka bun vek," tiin a boot thar chungchang a sawi.

Hausa thilphal
Tunah erawh inkhelhna tur boot pawh chungchangah buai a ngai tawh lo - thawmhnaw siamtu lar Nike-in an boot a bun sak avangin pawisa ṭhahnem tak an pe tawh zawk. Football thiamna lamah pawh an khua Tocopilla ni mai loin an ram Chile-ah ber ni phak a ni a, ram tan match 119-ah goal 39 khung tawhin an ram tana goal khung tam ber a ni.

Football hmanga sumdawnna a ṭhang zel a, player-te pawh millionaire rual an ni. Chung zingah pawh chuan Sanchez chu a hausa pawl a ni phak. Manchester United tana a khelh avangin kum li leh a chanve chhungin chhiah pek hnuah kum khatah pound maktaduai 14 a la lut dawn. Arsenal-a a khelh lai pawh khan Sanchez hian sum a hui lut hnem tawh a, nikum March thlaa Lincoln City nen an inkhelh ṭumin a car £150,000 man Bentley chu a khingpui player-te car man belhkhawm aia a tam zawk.

A hausak hnuah Sanchez hian a sei lenna hmun Tocopilla a la hre reng a, an khaw mipui punkhawmna pakhat 'yuletide fair' ah a ṭhiante nen truck-ah thil sem tur an phur a, an sem kual ṭhin a, a school hluia naupang te tan thawmhnaw leh thilpek te a thawn ṭhin bawk. Tunah sum tam tak neiin duh duh lei thei tawh mah se Sanchez hian a naupan laia a hun tawn erawh a la dah hlu hle.

Sanchez chuan, "Kan khawsak a harsa chungin naupang hlim thei tak ka ni a, tun hnu thleng pawh hian ka neih zawng zawng chanin khatih hunlaia let leh kha ka duh a ni. Ka chhungte, ṭhiante leh nun hlui te kha theihngilh theih a ni lo a, khawvela mipa naupang hlim ber ni hian ka inhria," tiin pawisa awm lo pawha hlimna a awm thu a sawi.

Agent Felicevich
Kum 15 mi a nihin Sanchez hi Chilean footballer Arturo Norambuena chuan a agent Fernando Felicevich be turin thurawn a pe a, Argentinian agent lar hian Tocopilla-ah Sanchez-a nu chu be rawnin football career bakah a nitina khawsakna buaipui sak a tiam a. Felicevich hian thui tak thlir a, Sanchez-a te chhungkaw chunga ṭhat a chhuahna hi sum pei punna (investment) ṭha tak a ni thei ang.

Felicevich hi a intiamnaah a ding a, kum khat hnuah Sanchez-a nu Martina-i chu phalna nei loa sangha a zawrh avangin $1,000 chawi tura tih a ni a, nitin ei tur inhlawh chawpa khawsa tan pek ngaihna a awm lo. Hemi chungchang hi Sanchez-a'n a agent Fernando Felicevich a hrilh hriat hnuah a chawi tur a chawi sak bakah dan hmanga sangha a zawrh theihna turin registration a tihfel sak vek.

Argentina-a apiang Felicevich hi rugby player hlui a ni a, South America-ah chuan agent lar a ni. Forbes-in football agent thil tithei a thlanah parukna a ni pha a, nikum khan pound maktaduai 18 a hui lut a, kuminah erawh Sanchez zarah a pun belh ang. Alexis-a'n Manchester United a zawm aṭang ringawt pawh hian Argentinian agent hian pound maktaduai 15 a dawng nia sawi a ni.

Felicevich hnuaia player langsar te chu Bayern Munich midfielder Arturo Vidal, Bayer Leverkusen midfielder Charles Aranguiz leh Manchester City keeper Claudio Bravo te an ni.

Football zinkawng
Sanchez hian an ram club Cobreloa-a bul a ṭan hnuin Serie A club Udinese a zawm a, helai hmunah hi Sir Alex Ferguson pawhin a hmelhriat ṭanna a ni a, amaherawhchu Manchester United pan loin Pep Guardiola hnuaia khel turin euro maktaduai 26-in kum 2011 khan Barcelona a zawm a, Catalan club-a season thum a awm chhungin Champions League nomawi chawi lo mah se La Liga, Copa del Rey, FIFA Club World Cup leh UEFA Super Cup te vawi hnih ṭheuh a chawi.

July 2014-ah Sanchez hian Arsenal chu pound maktaduai 31.7-in a zawm a, London club tan hian a theihna zawng zawng hlanin FA Cup vawi hnih a champion pui nachungin league nomawi an chawi theih loh bakah Champions League inelnaa Europe club ṭha dang an el phak lo. Tun season-ah Europa League an khel a, season tharah pawh Champions League khel lo thei dinhmunah an ding a, hei hi Alexis-a'n Arsenal a chhuahsan chhan pakhat a ni.

Manchester United a zawm hnuah Sanchez chuan, "Tun hunah hian Arsenal player ropui Henry nena kan inbiakna te kha ka hre reng a, tuna ka chhuah chhan vang thoin anni pawhin a club khelhna a thlak a, ka hun a thleng ve ta a ni," tiin hlawhtlinna tam zawk chan duha chhuak a nih thu a sawi. Arsenal legend Thierry Henry hian Barcelona a pan hnuah La Liga title pahnih a lak bakah Champions League nomawi a chawi bawk.

Chilean forward Sanchez hian a chhuah chhan hi sawifiah mah se Arsenal ṭantute chuan an pawm a rinawm lo a, ‘Alexis Sanchez Baby' tihin an zai sak tawh lo ang. Chutihrualin kum 29 mi a ni tawh a, Arsenal manager Arsene Wenger-a sawi ang takin tun hi a football zinkawng a hun pawimawh a ni a, beisei nei chunga United a zawm hi thutlukna mak a ni lo.

Tumruhna nei Alexis
Manchester United-ah hian Alexis hi a hlawhtling ngei ang em tih hriat ni lo mah se a naupan lai aṭanga hun harsa paltlang tawhtu hian a club khelh tawhnaah 100% a pe ṭhin a, United ṭantute pawhin khelmuala a theihna zawng zawnga khel ṭhin player hi an ngaina thuai ang.

Alexis hian Premier League nomawi a la chawi loh avangin dahhniam ngawt theih a ni lo a, champion dan hmang hre turin Lionel Messi-a chawi theih loh Copa America nomawi chu kum zawnin a chawi tawi tawh a, an champion hnuhnung zawk kum 2016-ah phei chuan golden ball a dawng.

United manager Jose Mourinho chuan player naupang zawk Marcus Rashford leh Anthony Martial te chuan Alexis-a rilru put hmang aṭangin thil tam tak an zir theih a beisei. Chilean player hian a hlawh aṭangin United-ah hmun pawimawh a chang dawn tih a hriat theih a, Romelu Lukaku leh Paul Pogba te nen an inkawp fuh ang em tih erawh hunin a la hril ang.