Coutinho inlan zanah Barcelona an chak
Pound maktaduai 142-a Barcelona pantu Philippe Coutinho chuan Ningani zan khan Catalan club tana a match hmasa ber a khel a, an mikhual Espanyol lakah 2-0 in hnehna a chang.
Copa del Rey aṭangin team lian Atletico Madrid leh Real Madrid petchhuah an ni tawh a, Barcelona erawh chelh din theih an ni lo–Lionel Messi leh Luis Suarez ten goal khat ve ve an khung a, first leg-a 1-0 a an ngam loh team hi inkhel pahnih belhkhawmah 2-1 in an lehthal.
A goal hma
Inkhel ṭan aṭanga minute kuana lekah Barcelona-in goal hmahruai an khung nghal a, Luis Suarez chuan Aleix Vidal hnen aṭanga a cross hmuh chu first leg-a an si phurh sut nan a hmang.
Barca-in an duh tawk mai lo, minute 25-na a ni a, Catalan club tan Messi a inlar ve leh thung–Argentina captain shot hi defender Naldo chuan lo dang perin goalkeeper Pau Lopez-a'n ball kalna tur a ring sual.
Messi hian goal hnih khung theihna remchang nei mah se Ivan Rakitic hnen aṭanga a ball hmuh chu post tauh per nan a hmang. Espanyol-in hun ṭha nei lo tawp an ni bik lo–Gerard Moreno leh Esteban Granero ten an hun ṭha neih an chhawr lo a, Moreno hian Jordi Alba nen ball an inchuhna lamah a tluk avangin penalty beisei mah se pek a ni lo bawk.
Hei le Coutinho
Barcelona-in Coutinho manah pound maktaduai 142 ngawt an thehchhuak ngam a, khawvelin Liverpool playmaker hlui inlan hun tur hi nghakhlel takin a thlir–Espanyol lakah minute 22 a la awm tihin tlan luhtir a ni a, a khel chhe lo.
Brazil international hian Luis Suarez tan ball ṭha zet a siam sak hman a, mah se Uruguayan striker pet goal ngei tawh tur nia lang chu Espanyol keeper Pau Lopez-a'n a ṭhat tawkzia pholan nan a lo hman sak.
Coutinho chuan, "Barca tana ka match hmasa ber a nih avangin ka tan chuan vawiin hi a danglam hle. Club ropui tak a nih avangin ka zam em em a, mah se mipui min lo lawmna khan hahdam takin min khelhtir a ni," a ti–Barca hian Pathianni zan dar 1:15-ah La Liga match khel turin Alaves an mikhual dawn a, Coutinho hi a inlan a nih chuan Barca tana a league match hmasa ber a ni ang.
Valverde beiseina
Barcelona manager Ernesto Valverde chuan Barca tana a match hmasa ber kheltu Coutinho chungchang sawiin, "Amahah hian beiseina sang tak kan nei a, kan game khelh dan aṭanga tehin kan ṭangkaipui tur chi player a ni. Mahni inringtawk tak, mal leh mal inhmachhawna player ṭha tak, ṭhiante tana hmun awl siam thiam a ni. Tun hi a bul ṭanna chauh a nih beisei ang," a ti.
Valverde chuan inelna chungchang sawi nghalin, "Semifinal kan lut ta a, a thiam pali zinga kan tel chhan chu kan thawhrim vang a ni. Cup game-ah hi chuan fimkhur a ngai em em a, vawi khat chetsual chuan inelna aṭanga petchhuah kan ni mai ṭhin," tiin a sawi.
Copa del Rey semifinal-ah hian club lian tia chhal tur lut an tam lo–La Liga lama che ṭha zingah Valencia chuan semifinal an lut ve bawk a, Atletico Madrid hnawt chhuaktu Sevilla leh Real Madrid pet chhuaktu Leganes chu semifinal lut ve dang an ni.
Mangṭha Mascherano
Ningani zana team pahnih inkhelh hma hian Barcelona tana season riat ngawt a khelh hnua China lam pan tur Javier Mascherano thlahna hun hman a ni a, Argentina international hian fan-te lawm a hlawh hle.
Barcelona tana match 334 khel tu defender hian Catalan club-ah nomawi 18 a chawi hman a, heng zingah hian La Liga nomawi pali leh Champions League pahnih a tel–tunah erawh Hebei China Fortune tan a khel dawn.
Chinese Super League club hi Manchester City manager hlui Manuel Pellegrini enkawlna hnuaiah an khel mek a, Mascherano hi a mikhual dawn lo–ram tana a khelhpui Ezequiel Lavezzi chuan nikum khan Paris St-Germain aṭangin he club hi a lo zawm tawh.