Saints-ah striker thar Carrillo

Southampton chuan AS Monaco aṭangin striker Guido Carrillo chu pound maktaduai 19 in an lalut, kum 26 mi Carrillo hian kum 2021 thleng daih contract a ziak.

Argentine striker hian 2015 khan Estudiantes aṭangin Monaco hi a zawm a, Ligue 1 champion tan hian goal 20 a khung tawh. Season kal laiah match 22 khelin goal nga a khung tawh bawk. Carrillo leh Southampton boss Mauricio Pellegrino te hi Argentine club Estudiantes tan an lo thawkdun tawh a ni.

Saints tan hian striker rinrawl Charlie Austin chu hliam vangin a chawl mek a, Shane Long leh Manolo Gabbiadini ten beisei an phak loh avangin tlarhmaa tlan tur an mamawh–Carrillo hi player pawimawh ni phak tura ngaih a ni.

Kum 26 mi Carrillo chuan, "Ka naupan lai aṭangin Premier League hi ka en tawh a, khelh ve pawh ka chak ṭhin hle. Southampton inkhel pawh ka en ṭhin, an hnena khelh ve theihna tur hun ṭha ka nei thei hi ka lawm hle. Khawvela league lian leh hriat hlawh ber pakhatah chona thar ka hmachhawn dawn a ni," tiin a sawi.

Southampton hian Liverpool lakah an defender Virgil van Dijk chu pound maktaduai 75-in an hralh tawh a, manager Pellegrino-a'n a squad ti chak turin player a melh mek zel. Tun thlasik transfer chhung hian Spartak Moscow winger Quincy Promes chu pound maktaduai 30 velin lakluh an tum mek.

Nikum nipui transfer lai khan Southampton hian an player manto ber ni turin Mario Lemina chu pound maktaduai 18.1 in an lalut tawh a, Carrillo hian rawn khum ve leh chiahin Quincy Promes hi an lalut thei a nih chuan an record thar hi a khum nghal ang.