Russian athlete 169 inlan dawn

Russian infiammite tan buaina a la reh lo a, kawl a eng ṭan deuh zel nia ngaih a ni thung. Thla leha neih tur Pyeongchang Winter Olympics-ah Russian athlete 162 te an inlan thei dawn. Mahse, ram aiawh ni loin neutral flag hnuaiah an inlan thung ang.

Kum 2014 khan Russia hian an khawpui pakhat Sochi-ah Winter Games hi an thleng a, an champion. Amaherawhchu, he infiamna khawmpui lianah hian an ram sorkar hriatpuina ngeiin an infiammi ten dan an bawhchhia tih hriat chhuah a ni a, an chungah hremna lekkawh zui nghal a ni bawk.

International Olympic Com-mittee chuan Rio Olympic neih dawna an tih ang bawkin, Russian athlete zingah IOC dan leh hrai thar zawm famkim theite chu neutral athlete ni chungin South Korea-ah an inlan an phal sak leh ta zawk a ni.

IOC chuan infiammi 169 an pawm thu an sawi rual hian an hming erawh an la sawi chhuak lo a, Pathianni hian puan chhuah tura tih a ni. Russian athlete zingah 389 vel zet chuan IOC hnenah hian Winter Olympic-a inlan dilna hi an thehlut a ni.

Russian Olympic Committee vice president Stanislav Pozd-nyakov chuan, "Infiammi 169 pawm an ni a, hun tiam a thlen hma chuan hming tarlan theih ni lo mah se kan hriat danin a ṭha zualte tan hmun a awm dawn lo," tiin a sawi.

Kumin Olympic Winter Games hi February 9-25 chhungin Pyeongchang, South Korea-ah neih a ni dawn a, he hunah hian North Korea pawh an inlan dawn avangin ṭum dang zawng aiin ngaihven a hlawh zual tura ngaih a ni.