Euro Nopuiin Rome a pan

European Championship nomawi chu Roberto Mancini kaihhruai Italy-in Rome-ah an hawn dawn. Pathianni zan khan Wembley Stadium-ah final hmuhnawm tak khelh niin, hun pangngaiah 1-1 a an inhnehtawk hnuin penalty shootout-ah Azzurri hi England lakah 3-2 in an chak.

Italy-in kum 53 hnuah Euro nomawi an chawi a, Mancini hote hi inelna ṭantirh aṭanga khel ṭha tluang ber a nih avangin champion phu ber an ni. England erawhin semifinal leh final thleng mah se kum 55 hnuah an hun a inher chhuak lo a, a vanduai zawkah an ṭang.

Huai leh huai lo
Roberto Mancini-a'n May 14, 2018 aṭangin Italy a enkawl ṭan a, ngaihdan nghet tak leh kalphung nghet a nei. Manchester City manager hlui hian 4-3-3 formation hmangin team a rem a, an khingpui milin a khelh dan a thlak lo - Euro final-ah pawh a danglam lo.

Italy-in Spain an hmachhawn ṭuma bul ṭantute bawk an rin laiin England manager Gareth Southgate erawhin a khingpui milin player a rem. Three Lions-in player ṭha rual an kawl chungin a dawihzep zawkah an ṭang a, bul ṭan turin defence panga rawn thlangin Bukayo Saka aiah Kieran Trippier a thlang.

Southgate thutlukna erawh dem theih a ni lo, Germany an hneh ṭum pawhin defender panga a hmang a, a hlawhtling. English coach-in thutlukna huaisen a siam a, attacking player pangngai taka a luhtir chu team nem Ukraine an tum chauhin a ni thung.

Wembley an lawm
England-in bul an ṭan ṭha a, minute hnihna lekah Trippier-a cross chu Shaw-a'n a vaw lut. Three Lions an lawm a, Southgate-a thutlukna a fuh. Goal vang chuah ni loin first half-a goal an venhim danah pawh England player-te an khel ṭha hle.

Three Lions tlarhnunga ding Harry Maguire leh a hoten Italy tlarhma an dang chat a, Azzuri an che thei lo. English midfielder Declan Rice a che ṭha a, Italy tan hmun awl an siam duh lo. Lorenzo Insigne-a'n risk huai deuh mah se Pickford a tibuai pha lo a, Federico Chiesa chiah Italy forward zingah hlauhawm a awm.

Mancini thluak
Halftime-ah Mancini-a'n a hun ṭha neih a hmang ṭangkai a, second half-ah khelh dan ngai tho siin game a rawn ti dang. Bench aṭangin Byran Cristante leh Domenico Berardi te an rawn lut a, Chiesa a hmuhnawm zel bawk avangin Italy an nung thar hle.

Chutihrualin second half ṭantirh chiahah Raheem Sterling-a'n penalty a beisei a, Leonardo Bonucci-a'n ti tlu ngei mah se referee Bjorn Kulpers-a'n a pe tlat lo. Denmark laka tlu awlsam Sterling leh England an vanduai.

Minute 67-naah Italy an vannei ta a, corner aṭanga ball per chang fuhtu Leonardo Bonucci-a'n goal pawimawh a khung. Italy-in goal an khung tak avangin England dinhmun a ṭha ta lo a, Azzurri dinhmun a ṭha ta zawk.

A huai zawk Azzuri
Hun pangngaiah goal a luh belh lo a, extra time-ah goal hmuh tur a awm lo. Chutihrualin an khelh danah Italy chu a huaisen zawk an ni a, midfield an thunun zawk.

Southgate a thil tum a fuh ta lo a, player khel ṭha Rice aiah Liverpool captain Jordan Henderson a luhtir a, midfielder tawnhriat nei ṭha hi inkhel game fuh tawh lo laklawhah a siamṭhatu aia a talbuai pawla a ṭan avangin thlak leh a ṭul.

England manager hian hun tawp dawnah penalty pet turin Marcus Rashford leh Jadon Sancho te a luhtir a, bench aṭanga lut kum 19 mi Bukayo Saka chu penalty pet turin a ring bawk.

Penalty-ah a vannei zawk an chak ṭhin a, England erawhin an chak loh chhanah final thlenpuitu Southgate an mawhpuh thei ang. Rashford, Sancho leh Saka ten an pet goal lo vek a, tawnhriat ngah zawk leh kum lama upa Raheem Sterling, Jack Grealish, John Stones leh Luke Shaw ten an pet lo.

Italy keeper Gianluigi Donnarumma a hming ṭha a, Roberto Mancini hoten Rome-ah Euro nopui an hawn. England erawh kum 1996-a an mittui tlakna hmun Wembley Stadium-ah bawk an mittui a tla nawn a, kum 55 chhung nomawi an beisei tawh chu an beisei chhunzawm leh zel a ṭul dawn a ni.

Ka naute kha an che ṭha thlawt. Thuin ka lawmzia ka sawifiah thei lo, squad duhawm tak a ni. Final hi a harsa dawn tih kan hre sa a, goal kan chhuah hma avangin a harsa lehzual. Amaherawhchu goal kan chhuah hnuah inkhel kan thunun. Penalty-ah chuan vanneih a ṭul. England ka tawrhpui a, inelna ṭha tak an hmang a ni.
- Roberto Mancini, Italy coach

Manager huaisen zawk hote an chak : Mancini leh Italy-in Rome-ah Euro nopui an hawn
Italy-in World Cup 2018 an khel pha lo a, hemi hnu hian Roberto Mancini ruaiin Italian manager hian Azzurri hi European Championship nomawi a chawipui nghal. Mancini hote hian Euro 2020 final-ah mualneitu England an hmachhawn chungin attacking game an khel ngam a, penalty shootout-ah chauh chak mah se chak phu zawk an ni.

Italy tan Mancini
Gian Piero Ventura hnuaiah Italy an mualpho a, Europe-a football thiam ramin World Cup an khel pha lo. Azzuri-in enkawltu nghet an neih hmain Luigi Di Baggio chu team enkawl turin an ruat a, Argentina an hneh loh bakah England nen an inhnehtawk.

Mancini hian a match hmasa berah Saudi Arabia a hmachhawn a, 2-1 chauhin an hneh. Italy hian match nga chhung chak hmel hmu zui lo mah se Italy coach hian 4-3-3 a hmang lui char char.

Team ṭha tak a din theih nan player 67 a chhawr kual a, heta ṭang hian Euro 2020 khel tur player 26 a thlang. Inelna ṭantirh aṭangin Mancini leh a hoten khelh dan phung nghet an nei a, semifinal-a Spain nen an inkhelh ṭumin a khel lo zawk ni mah se an khelh dan an thlak lo.

A tawpah tum dana chiang Mancini a hlawhtling a, England hnehin an champion a ni ringawt lo. Italy team hian match 34 chhung chak loh an nei tawh lo a, an record hi a ropui takzet.

Rome an thleng
Italy hian Wembley Stadium-ah nomawi an chawi zawhah Euro Nopui hi Rome an panpui nghal a, captain Giorgio Chiellini chuan, "He nomawi hi Italian mipui tan a ni," tiin a sawi.

Chiellini hian nomawi hi khumah a mut a, a hnuaiah, "Fabio Cannavaro hnung ka rawn zui e," tiin a dah. World Cup 2006 champion puitu captain Fabio Cannavaro chuan, "Captain, kan lawm e. Italian nih a nuam leh ta sawt. Naute (nomawi) kha tuam ṭha ang che," tiin a rawn chhang.

Wembley Stadium-a an chak zawh chiah hian final-a goal khungtu Leonardo Bonucci chuan camera hmaah, "Rome-ah nomawi kan hawn dawn," tiin a rawn au a, Juventus defender hian press conference-a Cristiano Ronaldo dah sawn 'Coca-Cola' chu a in sak bawk.

Final-ah hian Belgium nena inhliam Leonardo Spinazzola pawh a rawn tel thei a, Italian defender hian duhsakna dawngin medal a awrh hmasa ber. Italy team inlungrualna a lang a, an chevel a hmuhnawm hle.

Italy player-ten dah ṭhat atan Wembley Stadium-a goal net chu an chep thla a, Azzurri hian an hun tawn ropui tak chu nuam ti takin an hmang. Final khelhna hmun Wembley Stadium chunga 'kual' (arch) chu Italy flag rawngin a hring, a var leh a senin an kap êng a, Italy tan zan duhawm bik a ni.