Grand Slam vawi 20 champion thei Djokovic

Novak Djokovic chuan Matteo Berrettini hnehin Wimbledon nomawi a chawi. Serbian star hian Grand Slam title 20 a lak tlinna chiah niin, record nei ṭha ber Roger Federer leh Rafael Nadal te a nih rual nghal chiah.

Pathianni zan All England Club-a inkhelah Djokovic hian 6-7 (4-7), 6-4, 6-4, 6-3 in hnehna a chang. Nomawi a chawi hnuah hlawhtlinna dang chan belh zel a la tum thu a sawi chhuak, mipa tennis inelna boruak a sang zel dawn.

A ṭha tawk
Centre Court-ah entu mi 15,000 an pungkhawm thei tawh, tun hma angin boruak nuam tak hnuaiah final an khel thei. Set hmasa berah Djokovic-a'n a khingpui service a chhuhsak nghal a, harsa vak loin set a la zui tura ngaih a ni.

Mahse, Italian tlangval service nei ṭha Berrettini-a'n rin loh tak maia chhuhsak letin set a la daih. Set hnihna aṭang erawhin player ṭha leh tawnhriat nei hnem zawk a chungnung a, a zawna set thum la turin harsatna lian tham a tawk zui lo.

World number 1 Djokovic-a'n darkar thum leh minute 23 chhungin hnehna a chang a, ṭum danga a lo tih ṭhin tawh dan angin a chak hnuah inkhelhna grass chu tlem a ei; tun hmain ṭum nga chu a lo ei tawh bawk, ei belh zel a tum ang.

Golden Slam
Season tir lamah khan Australian Open a chawi a, French Open-ah pawh Nadal meuh hnehin a champion - Wimbledon a la leh ta bawk. Olympic awm kum a ni a, Tokyo Olympic leh US Open a lak theih chuan 'Golden Slam' a ni ang.

Mipa tennis player zingah season khat chhunga major title pali leh Olympic champion ni kawp thei an la awm ngai lo. Serbian tlangval chuan, "Ka in ngaihtuah hmasa ang, tunah chuan 50-50 a ni," tiin Olympic a khel ngei dawn em tih a sawi chiang thei lo.

Steffi Graf-i'n 1988 khan 'Golden Slam' hi a lo hlen chhuak tawh, season tinin Grand Slam khel mah se Olympic chu kum li dana neih a ni a, hei vang hian Djokovic pawhin kumin bak hun ṭha a nei kher lo ang.

Duhthusam
Engtik niah emaw chuan mipa tennis player ropui ber zinga mi ka la ni ve ang, tiin duhthu a sam ṭhin a, a duhthusam chu tunah a lo thleng dik ta. Djokovic chuan tawp mai a la tum lo, nomawi dang a la duh belh.

Seeded pakhatna Djokovic chuan, "Kum sarih mi lek ka nih lai khan Wimbledon trophy lem hi ka siam chawp a, ka chawi der ṭhin. Tunah chuan a tak ngeiin vawi ruk ka chawi ta, beisei phak baka sang a ni ta.

"Tennis inelna ropui chhawp chhuaktu Rafa leh Roger te ka hrereng, anni vanga tun dinhmun hi thleng thei ka ni. Anni hian ka rilru, taksa leh thlarau thlengin min ti chak, season 10 duhawm ka hmang tawh, tunah hian a tawp mai lo ang," a ti.

Berrettini beiseina
All England Club inbuatsaih nan Queen's Championship-ah Berrettini a champion a, season a hman ṭhat bawk avangin grass court inelna lian atan beisei pawh a nei sang hman hle - seeded pasarihna niin champion a tum ngam.

Kum 25 mi Berrettini hian bul a ṭan fuh a, world number 1 Djokovic zawkin set khatna bikah double faults vawi hnih ngawt a neih avangin Berrettini-a'n pressure a pe na ve hle tih a hriat, mahse inelna liana tawnhriat a neih ṭhat loh a tuar.

Italian tlangval Berrettini chuan, "Final ka thleng pawh kha ka lawm, chutih rual chuan Wimbledon bakah Grand Slam dangah pawh ka final khelh hnuhnung ber a nih loh ka beisei," tiin a hma hun a êng zawngin a thlir.

"DjokerNole ka lawmpui che, Grand Slam title 20 lak tlin hi a ropui a, tunah chuan mi pathumuin a dinhmun kan inluah ṭawm ta. I khel ṭha a, nang leh i team ka lawmpui takzet che u,"
- Rafael Nadal

"Grand Slam title 20-na i la thei hi ka lawmpui che. Tennis hun tawn ropui lai taka i rawn inlan hi a lawmawm a, hetianga hlawhtlinna lian tham chan hi i phu, i khel ṭha e,"
- Roger Federer