Goal khung hnem ber Ronaldo

Euro 2020 khelh zawh takah Cristiano Ronaldo chu 'top scorer' a ni. Portugal captain hian goal nga a khung a, minute 360 a khelh chhungin a ṭhiante khung tur vawi khat a siamsak bawk.

Ronaldo goal khung zat tho hi Czech Republic forward Patrik Schick chuan a khung ve. Mahse, Bayer Leverkusen hmatawng hian assist a nei ve lo a, goal nga khung tur hian khelmual chhungah hun a hmang rei (404 minute) zawk bawk a ni.

Kum 36 mi Ronaldo hian group match hmasa bera Hungary an hneh ṭumin, hun tawp dawnah goal hnih khungin an ram a chakpui. Germany an hneh loh ṭum pawhin goal a khung tho a, France nen an inhnehtawk theih nan penalty vawi hnih a khung bawk.

Juventus forward hian Euro a khelh tawh zawng zawngah goal 14 a khung tawh, Euro chanchinah ani aia khung hnem an awm lo. Ram tan inelna hrang hrangah match 179 a khelh aṭangin goal 109 a khung tawh bawk a, hmabak erawh a la nei.

International football-a goal khung hnem lamah Ali Daei nen an intluk mek, a elpui hi a chawl tawh thung - Ronaldo erawh ram tan a la inlan chhunzawm dawn avangin record thar a la siam leh ngei ang.