Rawlthar duhawm ber Pedri

Spain midfielder Pedri chu Euro 2020 khelh zawh takah khan Young Player of the Tournament atan thlan a ni a, rawlthar duhawm ber chawimawina dawngtu hi kum 18 mi a ni.

Euro ṭan hma khan Pedri hian ran tan match li chiah a la khel, inelna lianah erawh coach Luis Enrique-a'n a ringtawk hle. Barcelona midfielder hian La Roja tan match a khel kim vek.

Spain tan a inlan kim a ni satliah lo, quarterfinal-a Switzerland an hneh ṭumin hun tawp hma minute khat la awmah thlak a ni a, a bakah thlak a ni lo - an ramin minute an khelh zawng zawng chhutin minute khat chiah a tel loin an khel tihna a ni.

Inelna a hman ṭhat avangin fak a hlawh, a bik taka semifinal-a Italy an hmachhawn ṭumin a khel ṭha zual. Minute 90 an khelh chhungin a pass dik vek a, extra time an khelh zawh meuh chuan vawi 66 a pass zinga 65 zet a la tidik thei tho.

Spain coach Luis Enrique chuan, "Kum 18 mi chauh ni chunga Pedri khelh dan hi midang pawhin an tih theih loh a ni, ani ang kumah chuan Andres Iniesta meuh pawhin hetiang aia sang chu a thei bik lo ang," tiin a player a dahsang hle.

Young Player of the Tournament dawng tur hian, inelna hmachhawn zinga player, January 1, 1998 hnu lama piang an ni tur a ni. Mimala an khelh ṭhat bakah team tana an ṭangkai dan hrang hrang chhutin lawmman hi an pe ṭhin.