FA-in a player-te thlavang a hauh

Euro 2020 final-a England tana penalty pet goal lotu Jadon Sancho, Marcus Rashford leh Bukayo Saka-ten Italy an ngam loh hnuah an vunrawng vanga hmuhsitna an tawk nasa a, Football Association chuan an player-te hi a chhan nghal.

FA chuan an player pathumten online kaltlanga hmuhsitna an tawk chu hriatthiam harsa an tih thu an sawi a, "Hetiang ang, midang hmuhsit chingte tan hian kan team-ah hmun a awm lo tih chiang takin kan sawi nawn duh.

"Harsatna tawk player-te ṭanpui turin theihtawp kan chhuah dawn a, chutihrual chuan thil sual titute chu hremna na thei ang ber pek an nih kan phut tlat a ni," an ti.

FA chuan sorkar leh social media thuneitute pawh online kaltlanga chi inthliarna a bo theih nana hma la chak turin an ngen zui a, English football thuneitu sang ber chuan, "Football aṭanga hetiang inthliarna duhawm lo hi a bo theih nan hma kan la zel ang.

"Chutihrual chuan sorkar pawh rang taka hma la a, hetianga che ṭhinte hremna mumal tak a awm theih nana hma la turin kan ngen bawk a ni," an ti.

Metropolitan Police-te chuan player pathumte chunga hmuhsitna lantirtute chu an chhui chian mek thu an sawi a, "Kan en liam mai mai lo ang," an ti.

FA chuan social media thuneitute ngen zuiin, "Social media company-te pawh hetiang hunah hian mawhphurhna la ngam a, hetianga midang hmuhsit chingte an platform aṭanga then fai an nih theih nana hma la turin kan ngen," an ti a, social media him zawk nan leh thil sual titute hrem an nih ngei theih nana 'evidence' lakkhawm kawnga hma la turin an ngen bawk.

UK prime minister Boris Johnson pawhin vun rawng vanga inhmuhsitna awm chu demin, "England team hian hmuhsit ni loin pasalṭha anga chawimawi an phu zawk a, hetianga midang chunga che duhte hi zak ngawih ngawih tur an ni," tiin a sawi.