Keimah vang a ni - Gareth Southgate

Ram tana penalty pet goal loh hrehawmzia hrechiangtu chu Gareth Southgate a ni a, a penalty pet goal loh vangin Euro 1996-ah England-in final an luh loh phah.

Coach a nih hnuah pawh penalty mangchhiain Southgate a la thlah lo a, Euro 2020 final-ah Three Lions hruai thleng mah se penalty hmangin a chak lo zawkah an ṭang.

Southgate-a'n a tawnhriat aṭangin a player-te chhan an ngai tih a hria a, an chak loh chu a thiam loh a nih thu sawiin huaisen takin mawhphurhna a la.

English coach chuan, "Keima thiam loh a ni. Training-naa kan thil hmuh milin thutlukna ka siam a, penalty pet tur kha keima thlan vek a ni," a ti a, dem tur chu amah a nih thu a sawi.

Mawhphurtu vek
Southgate-a'n hun tawp dawnah penalty pet hisapin Jadon Sancho leh Marcus Rashford a luhtir a, player pahnih hian an luh chhan an ti hlawhtling lo - an pet goal lo ve ve.

Kum 19 mi lek Bukayo Saka chu inkhel boruak sangah penalty pet tir a ni bawk a, Arsenal forward hian a pet goal loh avangin Italy an chak zui.

Saka mittui a tla a, Southgate-a'n pet goal loh hrehawmzia hriain a kuah nghal a, kum 19 mi, a professional zinkawng zawh ṭan ve mek chauh tan chuan tawrhthiam a har khawp ang.

Southgate chuan, "Tu tihsual bik mah a ni lo a, hnehna kan chan pawhin kan vai thawhrah a ni a, kan tlawm a nih pawhin kan vai thiam loh a ni. Penalty bikah chuan thutlukna siamtu ka ni a, mawhphurtu ka ni," a ti a, a tlanchhe lo.

Inchhuang rawh u
England-in Euro final an luh avangin fak an hlawh a, pen khat lek an pen belh theih loh avangin sawiselna nasa tak an tawk zui ta thung - "Southgate, nang ngei hi i lo ni," tia zai thawmte pawh a reh leh ṭan ta.

Southgate chuan, "Hetiang anga nomawi chawi theihna chance neih hi a harsa em em a, chuvang chuan tui taka mut hi kan tan chuan a harsa dawn a ni.

"Mahse, ka naute hian an hnathawh hi nakinah hahdam zawkin an thlirkir ang a, an hnathawhah hian an inchhuang hle tur a ni. Player-ten fak an phu a, an theihna zawng zawng an hlan," a ti a, a player-te a fak.

Southgate chuan sawi zawmin, "Ka player-te hi thawhpui nuam tak tak vek an ni a, heti chen hi an thleng thei a ni. Zep tur erawh a awm lo a, kan dressing room boruak chu a nguai hle a ni," a ti.

Midang tih theih loh!
Prince William chuan inkhel hi a hmunah a nupui leh fapa nen an en a, Three Lions hi an chak zawh loh hnuah dressing room-ah tlawhin an hnathawh avangin lawmthu a hrilh.

Southgate chuan, "Duke of Cambridge (Prince William) pawhin inkhelh zawhah player-te a rawn hmu a, an phu ang ngeiin lawmthu a hrilh a ni," a ti.

World Cup 2018 semifinal-a England lo hruai thleng tawhtu Southgate hian nomawi chawi ta lo mah se an hnathawh ṭhat erawh a hre ve reng tho a, a sawi lang nawn leh ngat.

Kum 50 mi coach chuan, "Kum 50 chuanga England team tam takin an tih theih loh chu an ti a ni," a ti - World Cup 1966 hnua a vawi khat nan major tournament-ah an ram an hruai thleng tih mipui a hrilh nawn.