Fimkhur a ngai dawn - PV Sindhu

Tokyo Olympic atana badminton khelh dan tur phung a chhuak a, champion beiseiawm zinga mi PV Sindhu kalkawng chu beisei aiin a awlsam dawn niin a lang - Sindhu erawhin fimkhur a ngaih tur thu a sawi.

Rio Olympic silver medalist hian group match-ah Cheung Ngan Yi (Hong Kong) leh Ksenia Polikarpova (Israel) te a hmachhawn dawn, player pahnih hian tum hmain Sindhu hi an la hneh ngai lo.

World number 34 Ngan Yi nen vawi nga an inkhel a, number 58 Polikarpova nen vawi hnih an intawng tawh bawk - heng inkhelah hian Indian nula hian hnehna a chang fai vek a ni, knockout round luh beiseina a sang.

Sindhu chuan, "Tun hma lama thil thleng tawh thlir chuan group match bik chu a ziaawm deuh dawn a nih hmel. Mahse, Olympic a nih tawh chuan player zawng zawngin an theihtawp an chhuah lehzual dawn.

"Tournament dang nen a inang lo a, mimal ni loin ram tana khel kan nih avangin mawhphurhna pawh a sang zual. Fimkhur leh rilru fim taka khelh a ngai dawn a ni," tiin a sawi.

Rio Olympic-ah khan Sindhu hian final a lut, mahse gold medal match-ah Spanish star Carolina Marin a ngam lo. Kumiah champion lai Marin hi hliam vangin a inlan thei dawn lo.

Tokyo Olympic-ah hian tun hma lama bronze medal lo la tawh Sania Mirza a inlan phak dawn lo, mipa singles lamah pawh world number 1 hlui Kidambi Srikanth chu a ranking a hniam avangin a inlan phak dawn lo bawk.