Antetokounmpo hoin Bucks an chak
Nimin zing NBA Finals inkhelah Milwaukee Bucks chuan Phoenix Suns 120-100 in an hneh a, best-of-seven series khelh kal laiah Suns hian 2-1 in hma an la hruai - July 15, Ningani zing dar 6:30-ah game 4 an khel leh ang.
Game hmasa pahnihah Suns an chak a, anmahni mualah Bucks lamin hnehna an chang ve leh ta. An chak theih nan hian an thiampuipa Giannis Antetokounmpo chuan point 41 neiin a team a chakpui.
A ṭha bik Giannis
NBA Most Valuable Player vawi hnih ni tawh Antetokounmpo-a'n a match hnuhnung pahnihah point 40 a nei tling, player ropui Michael Jordan, Jerry West, Shaquille O'Neal, Rick Barry leh LeBron James te hnung a zui ve chiah.
Tun hmain player ropui bikte hian NBA Finals-ah a zawnin point 40 chuang an lo nei thei tawh a ni. Jordan phei chuan a zawnin match li chhung point 40 a nei tling ziah thei! Player dang chunga leng a ni.
Kum 26 mi Antetokounmpo chuan, "Hnehna chang tur chuan basket nei tura kan nawr nat a ngai, kan nawr na lo a nih chuan kan khingpui lamin min bei na zual ve thung, inven pawh a harsa ṭhin zawk.
"Mi ṭhenkhatin Michael Jordan nen min lo khaikhin tih ka hria, ka tan chuan lawmawm viau mah se Jordan ka ni lo. Kei chu Antetokounmpo ve mai ka ni, match tin mai hi nuam ti taka khelh ka duh," tiin a sawi.
Bucks tan Antetokounmpo bakah hian point 21 neitu Jrue Holiday leh Khris Middleton (18 points) te an che ṭha ve bawk. Game 4 hi anmahni mualah bawk an khelh dawn avangin chak zui an inbeisei ngam ang.
Suns an zuih
Quarter hmasa berah Phoenix Suns lamin 28-25 in hma an hruai zawk a, mahse quarter hnihnaah 17-35 zeta an hnufual avangin an tan thawhchhuah a harsa tawh a, a zawna match thum chak an tumna chu a thamral ta rih.
Suns tan kum 36 mi Chris Paul chu player pawimawh bik a ni leh, ani hian point 19 a neih bakah assist ṭum kua a nei bawk. Jae Crowder, Deandre Ayton, Devin Booker leh Cameron Johnson ten point 10 chuang nei ve bawk mah se hnehna chan nan a tawk zo lo.
American guard Pual hi player ṭha bik zinga mi a ni a, tun hmain New Orleans Hornets, Los Angeles Clippers, Houston Rockets leh Oklahoma City Thunder tan a khel tawh - All Star zingah vawi 11 zet a tel tawh bawk.
Mahse, a basketball zin kawng erawh a vannei tawk lo. Season 16 zet hnuah Paul hian NBA Finals chu a vawi khat nan a khel ve chauh a, a kum tam deuh tawh mah se team innghahna ber a la ni - team chakpui tur erawhin thlawptu a mamawh.
Paul chuan, "A bul kan ṭan fuh a, a laihawlah kan che fuh tawk lo. A tawp lamah kang leh deuh mah ila thil a harsa zo tawh si, hnehna chang tur chuan hniam fal lai awm loa khelh theih a pawimawh tih kan hriat nawn a ngai," tiin a sawi.
