Olympic beiseitu Barty

Ashleigh Barty chuan Wimbledon title a lak hnuah season a hman chhunzawm dan tur a sawi a, tunah chuan Australia tana Tokyo Olympic 2020 khelh theih chu a duhthusam a nih thu a sawi chhuak.

World number 1 hi Inrinni zan khan Karolina Pliskova hnehin All England Club-ah a champion, grass court inelna liana a champion vawi khatna niin, Grand Slam title pahnih a lakna a ni.

Kum 25 mi Barty chuan, "Wimbledon champion nih chuan engkim mai hi a cho awmin a phurawm nghal vek mai. Tunah chuan Australia tana Tokyo Olympic khelh chu ka hmachhawp a ni a, thil dang tam tak pawh hmachhawp ka nei tel.

"Ka ṭhiante nena hun hlimawm hman pawh ka châk, chutih rualin ran tana Olympic khelh chu ngaih pawimawh hmasak tur a ni ang," tiin infiamna liana hlawhtlin a chak thu a sawi chhuak.

French Open khelh laiin Barty hian hliam a tuar a, a inhnukdawk zui. Hun rei lote hnuah Wimbledon khel zuiin, a hliam erawh a dam tawh. Paris khawpuia inelna lian kha a khelh hun an sawn tlai avangin grass court inelna nen erawh a inhnaihchilh hle.

Barty chuan, "Tun hnai chawlh kar ruk chhung hian thil ka tawng hnem hle, hlimna leh lungngaihna a inchhawk reng a ni ber. Tunah chuan French Open vanga ka lungngaihna kha Wimbledon chuan lawmnaah a rawn thlak," a ti.