Belgium enkawl zel tur Martinez

Roberto Martinez chuan beisei angin Euro 2020-ah hlawhtling lo mah se a hna bansan a tum lo a, nakkuma neih tur FIFA World Cup-ah pawh Belgium enkawl chhunzawm zel a la tum.

Everton manager hlui kaihhruaina hnuaiah Belgium hian ranking an nei ṭha, tun hnai kum thum chhung chu a chung berah an awm thei. Mahse player ṭha tak tak kawl khawm chung siin hlawhtlinna an chang thei chuang lo.

Euro khelh zawh takah khan quarterfinal-ah Italy 2-1 in an ngam lo, ranking nei ṭha viau mah se inelna lian an hmachhawn ṭumin an duh leh beisei ang result erawh an la nei thei lo a ni.

Kum 47 mi Martinez chuan, "Coach ka nihna ka chhunzawm ang, engtik niah emaw chuan ka hna thawh lai aṭang hian hmabak nei tawh loa inhriat hun ka la nei ang, chumi hunah chuan ka bansan ang.

"Mahse chutiang rilru chu tunah hian ka la pu lo. Euro aṭanga kan tlak avang khan kan lungngai, tunah erawh chuan FIFA World Cup bakah Nations League kan khelh tur atan rilru kan pe tawh zawk ang," tiin a sawi.

Belgium hian player rualkhat ṭha bik nei mah se 2018 World Cup-a pathumna an nih bak chhuan tur an la nei lo. Nakkum World Cup-ah hian beisei an phak lo leh a nih chuan coach bakah player ṭhenkhat tan chuan hun ṭha a tawp tura ngaih a ni bawk.