Mangṭha Euro Hello FIFA World Cup!
Gareth Southgate-a'n Euro 2020 final-ah England a hruai thlen avangin fak a hlawh nasa a, ama pualin hla an sa a, English mipui zawng zawng chu a zunah an uai a ni ber mai.
Mahse, an fakna chil per pawh a hul hman lo ang tihah Southgate faktute kha hmelma an chang a, Euro nomawi chawi an inbeisei laia final-a Italy an ngam lo chu an hrethiam lo - penalty hlahtute thlengin an chilh rawn a, "A chhang eitute kha doral an chang zo ta," tih ang mai a ni.
England fan-ten heti taka Southgate an dem hian hriat loh pakhat an nei - Sir Alf Ramsey hnua major tournament final hruai thlengtu a ni tih hi. Hei vang hian Southgate-a'n final-ah thutlukna a siam fuh tawk lo a nih pawhin fak a phu a, Three Lions coach nih zel a phu bawk.
English football fan-ten FIFA World Cup-ah coach dang hmuh an inbeisei a nih chuan ngaihtuahna an sen ṭhat a ṭulin a rinawm - Southgate-a'n World Cup-a England enkawl chhunzawm a inbeisei thu a sawi tlat!
Hello Qatar
Southgate hian England football team enkawl tur hian World Cup 2022 zawh thleng contract a nei hrim hrim a, Football Association lam chuan a contract hi pawhsei sak an duh bawk.
English coach chuan, "Qatar-a England hruai hi ka duh a ni. Mahse, chumi tur chuan kan qualify phawt a ngai tih ka hria," a ti a, World Cup a thlir leh ṭan tawh.
Southgate chuan sawi chhunzawmin, "Tunah chuan Italy kan hneh lohna inkhelte en let a, kan tihsual siamṭhat ngai laite siamṭha turin hun ka mamawh a, chawlh ka mamawh bawk.
"Hetiang ang inelna lian thama mahni ram hruai theitu nih chu a ropui a, chutihrual chuan a chauh thlak em em bawk a ni," a ti a, chawlh phawt a mamawh thu a sawi.
Sum a ni lo
England-in Euro final an luh hma khan Football Association chuan Southgate hi contract thar ziahpui an duh thu an lo sawi daih tawh a, khatihlai khan last 16-a Germany nena inhmachhawn an la hmabak.
FA chief executive Mark Bullingham chuan, "Gareth kan rinna hi a la nghing chhin ngai lo a, 100% in kan thlawp thlap a ni," tiin a lo sawi tawh a, Germany kha lo ngam lo ta pawh ni se cham turin an duh tho tihna a ni!
Southgate hian World Cup 2022-a England hruai ngei a tum thu a sawi rualin contract thar erawh a la ziak duh rih lo a, kum 50 mi coach hian sum vanga a contract chu tikhawtlai a nih loh thu erawh a sawi thung.
England boss chuan, "Contract thar chungchang sawi ka duh rih loh chhan hi sum vang a ni a, FA-in min thlawp tlat hi ka lawm takzet a ni," a ti.
A vawrtawp
Euro final-ah meuh a team a hruai thleng a, coach langsar leh hlawh hnem zawkten, player langsar tam tak kawl chunga an tih theih loh chu Southgate hian a ti thei tlat - heti chung hian English coach chuan a team chuan a vawrtawp an la thlen loh thu a sawi.
Southgate chuan, "Ngaihtuah tur tam tak a la awm a, kum li chhungin hmasawn zawngin kan kalin ka hria. A nih tur ang takin thil tam tak kan ti a, he team hian a vawrtawp kan la thleng lo tih kan hre bawk," a ti.
Three Lions-in Euro final hial an thleng a, an tlawmna pawh penalty a ni - mahse, sawiseltu tam tak chuan he team hi an la hriam tawk loa an ngaih thu an sawi a, an la zakzum deuhah an ngai.
Mahse, Southgate chuan, "Kan team hi en ula, player ṭhenkhat chuan an theihna sang ber an la tawng lo - an ṭhat dan ber thleng turin kum hnih aṭanga kum li bawr vel thleng la mamawh an awm a ni," a ti.
A bul aṭangin
Southgate chuan an tan final-a chak loh chu tawrh thiam a har thu sawiin, "Infiamna khawvelah i inhmang a, final i lut a nih chuan a hlutzia i hrethiam ang. Thil thleng zen zen a ni lo a, chuvang chuan a tlawm zawk nih chu a na duh em em a ni. Theihna zawng zawng kan hlan a, a bak a awm tawh chuang lo," a ti.
Player a nih laia England tana vawi 57 inlan thei Southgate chuan, "Hetah hian kan chawl lo ang. Theihtawp kan chhuah chhunzawm ang a, mahse, awlsam taka Qatar-a kan champion tur thu sawi chi a ni lo.
"World Cup-a kal tur chuan inpettlin leh phawt a la ngai a, a bul aṭanga engkim ṭan leh vek a ngai dawn a ni," a ti a, qualifier hautakin a hmuak tih a hai lo - England hian September 2-ah World Cup qualifier match khel turin Hungary an lenchilh dawn a, tunah hian team parukna awmna group I-ah match thum aṭanga point kua neiin hma an hruai mek.
Southgate chuan sawi zawmin, "Ka player-te nen ni tin kan thawk ho thei kha nuam ka ti takzet a, lungchhiatthlak taka a hnu khar a ngai ta erawh pawi ka ti a ni," a ti.
Hnathawh atchilhtu
England-in Italy an hneh lo lai kha Southgate-a ṭhian ṭha leh Crystal Palace-a a boss hlui Alan Smith chuan a hmunah a en a, Southgate-a nupui leh a nu leh pate nen ṭhu hoin Three Lions tlawm lai an en.
Smith chuan, "Southgate-a chhungte hian an theihna zawng zawngin Gareth hi an thlawp a, football-ah chuan engtiklai pawha hlim theih a nih loh avangin harsatna tam tak an paltlang ho a ni. Penalty pet a nih lai khan he chhungkua nihna dik tak hi ka hmu a, an hawisawn lo - huaisen takin an en vek a ni," a ti.
Southgate-a ṭhianpa chuan sawizawmin, "Gareth kha inkhelh zawhah a rawn kal a, rei tak an inhmuh loh hnuah ṭawngkam khat bak thluai thlumin an inbe rei hman lo - chu chuan an rilru paukhauhzia a pholang a ni.
"Tun hi Gareth-a tan ke pen chhunzawm zel hun a ni a, hnathawh atchilh mi a nih avangin Nilainiah chuan England hmachhawpte thlirin hna a thawk leh tawh ang. A assistant pahnih Steve Holland leh Chris Powell bakah coaching staff dangte a titi pui ang a, team ṭha zawk din dan tur an sawi ṭan ang," a ti a, Southgate-a'n chawlh a thiam ve loh thu a sawi.
Hnathawk ṭha, mahse hlawh tlem!
Southgate-a'n kum khatah pound maktaduai thum bawr vel a hlawh anga sawi a ni a, sum tam tham tak ni mah se a hna chelh leh a team enkawl ngaihtuah chuan a hlawh hi a tam tawk lo!
Khawvela football coach hlawh hnem bera ngaih Pep Guardiola-a'n kum khatah pound maktaduai 20 vel a hlawha ngaih a ni a, coach pahnih sulhnu thlirin Southgate nena khaikhin erawh a rem lo tih a lang chiang.
Chutihrual chuan Southgate hi England coach lo ni tawh zinga hlawh tam lo pawl a ni hrim hrim - World Cup semifinal, UEFA Nations League semifinal leh Euro final-a a team hruai thlengtu hian a contract tharah hlawh tam zawk a phut a nih pawhin a mak lo ang.
A hunlaia coach lar ber pawl Sven-Goran Eriksson khan 2001-2006 inkar khan England 'golden generation' tia an sawi team a enkawl a, mahse, World Cup (2002 & 2006) quarterfinal leh Euro (2004) quarterfinal a hruai thlen chu major tournament-a England a thlensanpui ber ṭum a ni - Swede coach khan kum khatah pound maktaduai 4.5 a hlawh thung!
Euro 2008-a England hruai thleng thei lotu Steve McClaren meuh pawh khan kum khatah pound maktaduai 2.5 a hlawh nia sawi a ni a, a hunlaia sum hlutna nena khaikhin chuan Southgate aiin a hlawh hnem niin
a lang.
Italian coach sulhnu nei ṭha Fabio Capello khan kum khatah pound maktaduai ruk zet a hlawh nia sawi a ni a, mahse, major tournament-a a kaihhruaina awmchhun World Cup 2010-a an thlen chin chu round of 16 a ni.
Roy Hodgson-a enkawlna hnuaiah England-in Euro 2012-ah quarterfinal an lut a, World Cup 2014-ah phei chuan group stage-ah an zinkawng a tawp - Euro 2016-ah a thiam 16 zinga tel phak hram chu an chan tawk a ni.
Mahse, he English manager hian kum khatah pound maktaduai 3.5 a la hlawh phak cheu a, Southgate ai chuan a la hlawh hnem tho! Sam Allardyce-a'n England a enkawl dawn khan kum khatah pound maktaduai thum hlawh turin an inrem a, mahse, thil dik loa a lo inhnamhnawih avang khan match khat lek hnuah a bang.
Big Sam tia hriat lar coach hian pawisa erawh a hum haw ṭeuh tho - FA nen inhriatthiam tawnnaa a contract an tihtawp avang khan pound maktaduai khat a dawng nia sawi a ni a, match khat lekah pound maktaduai khat a hlawh hman tihna a ni.
Southgate-a sulhnu thlirin tun aia hlawh tam zawk a phu a, "Sum vang a ni lo," tiin contract a tih khawtlai chhan a nih loh thu sawi mah se contract ṭha zawk, tun aia hlawh tam zawka a ziak a nih pawhin mak ti suh ang che.
Kan mamawh lo che u - Kane
England captain Harry Kane chuan ram tana a khelhpui Marcus Rashford, Jadon Sancho leh Bukayo Saka-te a chhan a, player pathumte chunga lungawi lohna lantirtu fan-te chu an mamawh loh thu a hrilh!
England-in Euro final-a Italy an hneh lohna inkhelah Rashford, Sancho leh Saka ten penalty an pet goal lo vek a, inkhelh zawh hnuah an vun rawng nena hmeh belin hmuhsitna an tawk nasa hle. Kane chuan hei hi hrethiam loin a ṭhiante hi a chhan a, Tottenham Hotspur striker chuan, "Hmuhsitna ni loin an mamawh chu thlawpna a ni a, social media-a midang hmusit ṭhin i nih chuan England fan i ni lo a, kan mamawh lo che," a ti - a insum duh bik lo.
Spurs striker chuan, "Euro-a hun duhawm tak hmangte kha, team-in a mamawh laiin huaisen takin an lo pen chhuak a ni," a ti a, a ṭhiante huaisenna chu a fak bawk. England defender Tyrone Mings pawhin a ṭhiante hi chhanin, "Mi maktaduai tel tana hlimna thlen tura he team tana tha thawh zawng zawngte ka chhuang takzet a ni..." a ti zet a, 'Mahse' tia chhunzawmin, "Ramin a mamawh lai taka huaisen taka pen chhuak ka ṭhianten chi inthliarna lam hawi zawnga hmuhsitna an tawk hian min run takzet a, mak erawh ka ti lo," a ti.
Mings chuan, "Thawnthu thar kan ziak a, midangin an la tih ngai loh chu kan ti a ni, hei hi chhinchhiah rawh u," tiin a sawi zui bawk. England tana penalty pet goal lo player pathumte chhan hian manager Gareth Southgate, UK prime minister Boris Johnson leh Football Association chu an lo ṭawng chhuak tawh bawk a, National Police Chiefs' Council Football Policing Lead chief constable Mark Roberts chuan Facebook, Instagram leh Twitter-te nen pawh he buaina avang hian inbiakna an neih thu a sawi a, "Chak taka hma lak mek a ni," tiin a sawi.
European football-a thuneitu sang ber UEFA chuan, "Player-te kan hre reng a, FA-in hetianga hmuhsitna lantirtute hremna na thei ang ber pek a duh hi kan thlawp tlat a ni," an ti bawk. League Two club Leyton Orient chuan player pathum laka che mawi lo zingah an fan pakhat a tel thu sawiin a dam chhung atan an hrem a, Premier League club Wolverhampton Wanderers chuan an fan pakhat chu che mawi lo zingah a tela an hriat thu sawiin police hnenah an thlen tawh thung.
Ka nihna avangin ngaihdam ka dil dawn lo - Rashford
Hmanni lawkah naupang ei tur nei lote tana a hnathawh avangin nasa taka fak hlawhin a awm a, mahse, Euro final-a penalty a pet goal loh meuh chuan football-in a hmel duhawm lo zawk a hmuhtir a, Marcus Rashford-a'n a vun rawng avangin hmuhsitna a tawk nasa hle.
Rashford-a pianna khua Withington-a a lem an ziah chu penalty a pet goal loh hnu lawkah nasa taka siam danglam a ni a, mahse, a hnuah thlalak dangin amah ṭantuten an hliahkhuh a, "Huatna chu hmangaihnain a hneh fo ang," an ti.
Manchester United striker pawh hian hmuhsitna a tawh karah ngawih reng a tum lo a, kum 23 mi striker chuan, "Mi zawng zawng thinlung ka ti na ni mai hian ka inhria a ni. Ka khelh ṭhat loh avanga sawiselna hi chu engtiklai pawhin ka pai dam thei a, penalty ka pet ṭha tawk lo - a goal tur a ni.
"Mahse, ka nihna leh ka pian leh seilenna hmun avang hian engtiklai mahin ngaihdam ka dil ngai lo," a ti a, chi inthliarna lam hawi zawnga den zui an nihna chu a hrethiam lo hle. Rashford chuan sawi zawmin, "Three Lions jersey ka hak lai ngei a, mi sing tel hmaa ka chhungten min lo thlawp tlat a ni tih hmuh aia inchhuan zawkna ka la nei ngai lo," a ti a, a tan chuan England jersey hak chu chawimawina ropui a nih thu a sawi.
Ram tan vawi 46-a inlana goal 12 khung tawh striker chuan a chawr chhuahna veng mipuite hnenah lawmthu sawi zuiin, "Hetiang hun hi a ni ka mangphan ṭhin chu. Vawiina ka message dawnten min hnem takzet a, Withington lamin ka thlavang an hauh dan ka hmuh hian ka mittui dan harsa ka ti.
"He khawtlang hian harsatna ka tawh laiin hmangaih takin min kuah a, min chawisan chhunzawm zel a nih hi," a ti a, an veng mipui chungah a lawm thiam hle. Rashford chuan, "Kei hi Marcus Rashford ka ni a, Withington and Wythenshawe, South Manchester aṭanga lokal, mi hang ka ni. Khawvelah hian ka neih zawng zawng pawh bo se, hei erawh ka lak aṭanga lak kian theih a ni lo.
"Hei aia ṭha zawk hian ka lo kir leh ang a, hei aia ṭha zawk hian kan lo kir leh ang," a ti a, hmuhsitna a tawhte chuan an tih hnual loh tur thu a sawi.